Конференцие хутшӑнакансем малтанах театр фойинче йӗркеленӗ куравпа паллашма пултарчӗҫ. Экспозицире - ӗҫре кирлӗ ятарлӑ тум-тир тата хӳтӗлев хатӗрӗсем. Тӗрлӗ предприятири специалистсем валли экспертсем калаҫусемпе ӑсталӑх лаҫҫисем ирттерчӗҫ. Производствӑра суранланакансене пӗрремӗш пулӑшу мӗнле памаллине кӑтартрӗҫ, ӗҫ саккунӗнчи улшӑнусемпе паллаштарчӗҫ.
Кӑҫалхи конференци ӗҫӗ-хӗлне 700 ытла ҫын хутшӑнчӗ. Вӗсене хӑрушсӑрлӑх йӗркине пӑхӑнса ӗҫлес, ҫакӑн валли тивӗҫлӗ майсем йӗркелес, производствӑра суранланакансен шутне чакарас ыйтусем пӗрлештерчӗҫ. Савӑнӑҫлӑ самант та пулчӗ. Ӗҫ хӑрушсӑрлахӗн культурине аталантарассине пысӑк тӳпе хывакансене наградӑсем парса саламларӗҫ.
Оксана Верликова, Виктор Степанов
