Шкул пӗтерекенсен умӗнче тӑракан тӗп ыйтусенчен пӗри вӑл - малашнехи пурнӑҫа мӗнле профессипе ҫыхӑнтарасси. Федераци хӑрушсӑрлӑх службинче ӗҫлекенсем кадетсене хӑйсен ӗҫӗ-хӗлӗпе паллаштарчӗҫ. Пулас чекистсене тата пограничниксене хӑш аслӑ шкулта хатӗрленине тата вӗренме кӗрес тесен мӗне ытларах тимлӗх уйӑрмаллине каласа кӑтартрӗҫ.
Ҫамрӑксем федераци хӑрушсӑлӑх службин хастарӗсене хатӗрлекен аслӑ вӗренӳ заведенийӗсем пирки фильм та пӑхрӗҫ. Вӗренме кӗрес текенсене ҫавӑн пекех ятарлӑ буклетсем валеҫрӗҫ.
Ставропольти институтпа вара унтан килсе ҫитнӗ представитель тӗплӗнрех паллаштарчӗ. Вӑл вӗренӳ учрежденийӗн историйӗ, хальхи пурнӑҫӗ пирки каласа кӑтартрӗ.
Ҫар ҫынни пулас тесен ҫивӗч ӑс-тӑн кӑна мар, сывлӑх та ҫирӗп пулмалла. Экзаменсене тата аслӑ шкулсенчи конкурссене парӑнтарса 1-мӗш курс студенчӗн ятне тивӗҫме пулать.
Оксана Верликова, Игорь Ульянов
