Александра Деверинская - Пӗтӗм тӗнчери Универсиада чемпионӗ, тӗнче кубокӗн кӗмӗл призерӗ, Совет Союзӗн темиҫе хут чемпионӗ, хӑвӑрт утассипе 3 хутчен тӗнче рекордсменӗ. Ҫуралса ӳснӗ тӑрӑхне килсе ҫӳрени ентешӗсемшӗн пысӑк чыс. Патӑрьелсем ача-пӑчаран пуҫласа аслисем таранах сывӑ пурнӑҫ йӗркине суйлани, шкулта физкультурӑна кӑмӑллани, пушӑ вӑхӑта уҫӑ сывлӑшра хусканусем туса, утма-чупма тухса ирттерни сумлӑ хӑнана савӑнтарать. Асламӑшӗ пек спортра пысӑк ҫитӗнӳсем тума ӗмӗтленекен мӑнукӗсем те ӑмӑртусенчен юлмаҫҫӗ.
Хальхинче Арапуҫ ҫӗрӗ Шупашкартан килнӗ атлетсен 15 ушкӑнне тата Патӑрьел спортсменӗсене йышӑнчӗ. Ҫанталӑкӗ уяр, старта тухакансен ҫӗнтерес тӗллевӗ ҫирӗп, ӑмӑртӑва курма килнисен кӑмӑлӗ савӑк.
Арапуҫ ҫӗрӗнче ҫулленех иртекен ӑмӑрту - аслисемпе ачасене пӗрлештерекен, хальхи ӑру утакан-чупакан сукмаксене такӑрлатнӑ спортсменпа калаҫса хавхалану кӳрекен уяв. Тата, паллах, ҫӗнӗ ҫитӗнӳсем патне илсе ҫитерекен тупӑшу. Мала тухнисене яланхилле паха парнесемпе, Тав хучӗсемпе чысларӗҫ.
Алиса Александрова, Иван Макеев
