Ку конкурса 2012-мӗш ҫултанпа ирттереҫҫӗ. Кӑҫал унта тӗрлӗ хулапа округри 20 служащи хутшӑнма кӑмӑл тунӑ. Вӗсен кашнин проект хатӗрлемелле пулнӑ. Темӑсем тӗрлӗрен: пӗр-пӗр лаптӑка тирпей-илем кӗртесси, туризма аталантарасси. Ҫавӑн пекех патриотизмпа воспитани ыйтӑвӗсене те хускатнӑ. Красноармейскисем вара халӑх пуҫарӑвӗн программипе анлӑ усӑ кураҫҫӗ: ҫулсем юсаҫҫӗ, пӗвесем тасатаҫҫӗ, социаллӑ объектсем ҫӗклеҫҫӗ. Мӑн Шетмӗ тӑрӑхӗнче кӑҫал, сӑмахран, 9 проект пурнӑҫа кӗртеҫҫӗ. Вӗсенчен 6-шне хута янӑ.
Конкурса хутшӑнакансен проектсене тӳресем умӗнче хӳтӗлеме тиврӗ. Тӗп тӗллев - ҫынсен пурнӑҫ майӗсене лайӑхлатасси. Муркаш администрацийӗн экономикӑпа инвестици пайӗн ертӳҫи Ольга Тимофеева хӑйӗн ӗҫӗпе ҫыхӑннӑ проект хатӗрленӗ.
Экспертсем пур проект та паянхи кунпа килӗшӳллӗ пулнине палӑртрӗҫ. Конкурс ҫӗнтерӳҫисен ячӗсене ҫавӑнӑҫлӑ лару-тӑрура юпа уйӑхӗн 22-мӗшӗнче пӗлтерӗҫ.
Диана Иванова, Димитрий Макаров
