Пултарулӑх ҫулҫӳревӗ тухӑҫлӑ пулнӑ. Артистсене ялсенче, шкулсенче ҫитӗннисем те, ачасем те кӑмӑллӑн кӗтсе илнӗ. Осипенкопа Дмитриевка ялӗсенче тата Андреевка поселокӗнче пурӑнакансене чӑваш артисчӗсем чӑн-чӑн уяв парнелерӗҫ. Куракансене вырӑсла ҫеҫ мар, чӑвашла юрӑсемпе те савӑнтарни вара пирӗн республикӑн культурипе тата йӑли-йӗркипе тарӑнрах паллашма май пачӗ.
"Ҫеҫпӗл" ансамбле йӗркеленӗренпе кӑҫал 55 ҫул ҫитрӗ. Ҫак вӑхӑтра вӗсем ӑҫта кӑна пулман пулӗ. Бердянск ҫӗрӗ ҫинче вара - пӗрремӗш хут.
Артистсен кашни юррине куракансем тӑвӑллӑн алӑ ҫупса йышӑнчӗҫ. Осипенкори культура ҫуртӗнче ӗҫлекенсем вара чӑтса лараймарӗҫ, сцена ҫине тухса чӑваш юрӑҫисемпе пӗрле шӑрантарчӗҫ.
Оксана Верликова, Елена Михайлова, Богдан Синицын, Дарья Филиппова.
