Вӗренӳре, пултарулӑхра аталанма ҫӗнӗ ҫулсем уҫниех пулнӑ ҫакӑ ачасемшӗн. Республикӑри 150 пин ытла хастар хутшӑннӑ проекта. Ачасем мультфильмсем ӳкернӗ, космосри сӑнарсен 3 Д хурӑмӗсене калӑпланӑ, ӳкерчӗксен конкурсӗнче тупӑшнӑ, калавсем ҫырнӑ, астрономи ӑслӑлӑхне тӗпченӗ. Пурӗ 10 тӗрлӗ конкурс йӗркеленӗ.
Хӑшӗ-пӗри харӑсах темиҫе ӑмӑртӑва хутшӑннӑ. Пултаруллӑ ачасемпе ҫамрӑксен "Эткер" центрӗнче чи маттур 45 хутшӑнакан валли "Школа Космогения" ятпа эрнелӗх программа ӗҫленӗ.
Вӗренӳ проектне хутшӑннӑ чи хастар шкулсем - Шӑмӑршӑ тӑрӑхӗнчи Карапай-Шӑмӑршӑри, Патӑрьелти 1-мӗш тата Шупашкарти 40-мӗш шкулсем. Вӗсене паха парнесемпе хавхалантарчӗҫ. Телескоп туянма май паракан сертификат таранах. Пухӑннисене халӗ тӗнче уҫлӑхӗнче ӗҫлекен космонавтсем те салам ячӗҫ.
Алиса Александрова, Виктор Степанов
