Педагогсен конкурсӗсене хутшӑнакансен йышӗ ҫулсерен ӳссе кӑна пырать. Хальхинче республикӑри тапхӑрта 196 ӑмӑртнӑ. Вӗсем пурте пултаруллӑ, ӗҫре пысӑк ҫитӗнӳсем тунӑ. Чи пӗлтерӗшли вара - ачасене юратаҫҫӗ. Чӑваш патшалӑх академи драма театрӗн сцени ҫине вӗрентекенсем, воспитательсем, социаллӑ педагогсем, класс ертӳҫисем хӑпарчӗҫ. Пурӗ 11 ӑсталӑх конкурсӗнче палӑрнисене чысларӗҫ. Шупашкарти сывлӑхӗ хавшак ачасене пӗтӗмӗшле пӗлӳ паракан 3-мӗш пуҫламӑш шкулти Галина Степанова «Чи лайӑх тьютор» ята тивӗҫрӗ.
Педагогсем ачасен пурнӑҫӗнче калама ҫук пысӑк вырӑн йышӑнаҫҫӗ. Вӗсем тарӑн пӗлӳ панипе пӗрлех, тӗрӗс ҫул ҫине тӑма пулӑшаҫҫӗ. Ҫак ӗҫ вара ача сатӗнченех пуҫланать. "Ҫулталӑк воспитателӗ" конкурсра Вӑрмарти "Березка" ятлӑ 1-мӗш сатикре тӑрӑшакан Ирина Михайлова лауреатсен йышӗнче.
Тӑван чӗлхепе литература вӗрентекенсен хушшинче чи лайӑххи тесе Людмила Николаевӑна палӑртрӗҫ. Ҫӗнтерӳҫӗ Шупашкарти 62-мӗш вӑтам шкулта тӑрӑшать. Ачасене чӑваш чӗлхине ӑша хывма пулӑшас ӗҫре хӑйӗн меслечӗсемпе анлӑ усӑ курать.
"Чи лайӑх класс ертӳҫи" - Шупашкар тӑрӑхӗнчи Тренькасси шкулӗнче вӗрентекен Анна Степанова пулчӗ. "Ҫулталӑкри воспитатель" конкурс ҫӗнтерӳҫи - Улатӑрти 1-мӗш "Теремок" ача сатӗнчи Любовь Дубровская. "Ҫулталӑк учителӗ" сумлӑ ята вара Ҫӗнӗ Шупашкарти 18-мӗш лицейри Артем Максимов тивӗҫрӗ. Вӑл историпе обществознани вӗрентет. Республика Пуҫлӑхӗн хушӑвӗпе килӗшӳллӗн ҫӗнтерӳҫӗсене 50 пинрен пуҫласа 150 пин тенкӗ таран парса хавхалантарӗҫ. Унсӑр пуҫне Артем Максимов Чӑваш Ен чысне Раҫҫей шайӗнчи конкурсра хӳтӗлӗ.
Диана Иванова, Михаил Солин
