Республикӑри ача сачӗсенче паянхи кун 150 агролаборатори ӗҫлет. Унта пӗчӗккисене мӗнле вӑрӑран мӗн ӳснине, ял хуҫалӑхӗнчи ытти вӑрттӑнлӑха уҫса параҫҫӗ. Чыслав кунӗ те тӗрлӗ ӳсӗмри ачасем хӑйсем мӗн пултарнине сӑнлакан курав хатӗрленӗ. Арҫын ачасемпе хӗрачасене сад-пахча ӗҫне явӑҫтарнисӗр пуҫне тӗрлӗ предприятипе те паллаштараҫҫӗ.
Тӳресем шухӑшне палӑртнӑ, чи маттуррисен хӑйсен ӗҫӗпе паллаштарасси тата парне йышӑнасси юлать. Сцена ҫине тухма пурпӗр хумхануллӑ. Ҫӗрпӳри "Хӗвеллӗ хула" ача сатне ҫӳрекенсем конкурса пуҫарса янӑранпах "Ташӑ" номинацире ҫӗнтерӗве алӑран вӗҫертмеҫҫӗ.
Тӗрлӗ номинацире мала тухнисене 3 ӳсӗмре палӑртнӑ. Сатик ачисем, шкулта вӗренекенсем тата техникумсенче ӑс пухакансем. Аслӑраххисем хушшинче "Ҫӗршыв илемӗ" эстрада ташшипе етӗрнесем ҫӗнтерчӗҫ.
Сӑрӑ-киҫтӗкпе туслисен те хӑйсен пултарулӑхне кӑтартмалӑх майӗ пулчӗ. Ҫемйине, пахчине, килти юратнӑ выльӑхне шур хут ҫине куҫарнӑ ачасем. "Манӑн пахча" номинацире, сӑмахран, пӗчӗккисен хушшинче Улатӑр тӑрӑхӗнчи Чуварлейри ача сатне ҫӳрекен Анастасия Скитяева мала тухнӑ.
Хальхинче сцена ҫине 39 ҫӗнтерӳҫӗ тухма тивӗҫ пулчӗ. Тепӗр 41-шӗ - 2-мӗш тата 3-мӗш вырӑнсем йышӑннӑ. Конкурсра палӑрнисене яланхилле хаклӑ парнесемпе чысларӗҫ. Велосипедран пуҫласа агролаборатори уҫмалли сертификат таранах.
Алиса Александрова, Екатерина Янгалакова
