Чӑваш Енре пурӑнакан 47 пин ытла ҫын Пӗтӗм Раҫҫейри "Наци кросӗ" чупӑва хутшӑнчӗ

Канмалли куна тӗрӗс те сывлӑхшӑн усӑллӑ пуҫлама шутланӑ халӑха малтанах Респубика Пуҫлӑхӗ Олег Николаев ӑнӑҫу сунчӗ.

Наци кросне хутшӑнма тухтӑр сывлӑх тӗлӗшӗнчен юрӑхлӑ тесе ирӗк пани кӑна кирлӗ. Ытти пӗтӗмпех чупӑва хутшӑнакансен кӑмӑлӗнчен килет. Спорт уявӗнче пӗчӗккисене те, аслӑ ӑрурисене те, профессионалсене те, ахаль чупса тухас текенсене те курма пулчӗ. Хӑйсен тӳсӗмлӗхне, ҫирӗплӗхне ҫак кун старта тухакансем 1 ҫухрӑмран пуҫласа 12 ҫухрӑма чупса тӗрӗслерӗҫ.

Шкул ачисем те ҫулран-ҫул кӗрхи дистанцие парӑнтарма йышпах Мускав ҫыранлӑхне васкаҫҫӗ. Класпа вӑхӑта усӑллӑ ирттереҫҫӗ, пӗрисем чупнӑ чухне теприсем хавхалантарса тӑраҫҫӗ. Чылай ҫемье "Наци кросне" йышпа хутшӑннине те сӑнама кӑмӑллӑ.

Ӑмӑрту ҫӗнтерӳҫисене дипломсемпе, медальсемпе, кубоксемпе, Раҫҫей спорт министерствин парнисемпе чысларӗҫ.

Алиса Александрова, Игорь Зверев