Ҫӗршывӑн тӗрлӗ регионӗнчен тата чикӗ леш енчен килнӗ хӑнасене яланхи пекех несӗлсен йӑлипеле ҫӑкӑр-тӑварпа тата чӑваш юрри-кӗввипе кӗтсе илчӗҫ. Пленарлӑ лару коопераци тытӑмӗн тӗп аталану ҫул-йӗрне палӑртакан канашлу пулчӗ. Кунта тӗрлӗ ҫӗршывра усӑ куракан ҫӗнӗлӗхсемпе сӗнӳсене, коопераци тытӑмӗнчи проектсене сӳтсе яврӗҫ. Калаҫӑва Республика Пуҫлӑхӗ Олег Николаев, ҫӗршыври Центросоюз Канашӗн председателӗ Дмитрий Зубов, ҫавӑн пекех коопераци пӗрлешӗвӗсен ертӳҫисемпе аслӑ шкулсен ректорӗсем хутшӑнчӗҫ. Дмитрий Зубов форум ӗҫне ҫамрӑксене ахальтен мар явӑҫтарнине палӑртрӗ. Иртнӗ 4 ҫулта коопераци институчӗсемпе университечӗсенче пӗлӳ пухакансен шучӗ 2 хут нумайланнӑ. Ӳсекен ӑрӑвӑн потребкооперацире нумай ҫул тӑрӑшакансен ӑсталӑхӗпе паллашмалла, ветерансен вара хӑйсен ӗҫне малашне камсене парса хӑварнине курмалла, терӗ вӑл хӑй сӑмахӗнче.
Пуласлӑх ҫирӗп алӑра. Ларура Раҫҫейри "Центросоюз" Канашӗ ирттернӗ конкурса пӗтӗмлетрӗҫ. Комисси коопераци енӗпе аслӑ пӗлӳ илекен чи пултаруллӑ 10 студентпа ҫак тытӑмра тӑрӑшакан специалистсене суйласа илнӗ. Вӗсене ҫывӑх вӑхӑтра тӗнче шайӗнчи коопераци альянсӗн ҫамрӑксен комитетне йышӑнӗҫ. Мала тухнисен шутӗнче "Чӑвашпотребсоюз" пӗрлешӳре инженерта вӑй хуракан Василий Мефодьев та пулчӗ. Вӑл ӗҫтешӗсемпе пӗрле ятарлӑ хушӑм шутласа кӑларнӑ. Ҫӗнӗлӗхе пурнӑҫа кӗртес тесе ҫулталӑка яхӑн тӑрӑшнӑ. Унӑн майӗсене республикӑра пурӑнакансем туйса илме ӗлкӗрнӗ те ӗнтӗ. Электронлӑ ҫӑмӑллӑхпа халӗ 14 муниципалитетри 200 ытла ялта усӑ кураҫҫӗ.
Ҫавӑн пекех "Кооперативный стартап" конкурсӑн ҫӗнтерӳҫине палӑртрӗҫ. Ҫамрӑксен суту-илӳ ӗҫне пуҫарассипе кӑсӑклӑ проект хатӗрлемелле пулнӑ. Чи ӑнӑҫлин авторӗ Саранскри коопераци институчӗн студенчӗ Тимур Аксянов тесе пӗлтерчӗҫ. Ҫӗнтерӳҫӗ хӑйӗн шухӑшне пурнӑҫа кӗртме пӗр миллион тенкӗ тивӗҫӗ.
Леонид Петров, Вадим Владимиров
