Професси ӑсталӑхӗн конкурсӗ республикӑра ҫулсерен иртет. Кӑҫал заявкӑсене пур муниципалитетран йышӑннӑ. Ӗҫпе тивӗҫтерекен центрсенчи 13 специалист тата 6 уйрӑм хутшӑнма кӑмӑл тунӑ. Вӗсем хӑйсен ӗҫӗ-хӗлӗпе паллаштарнӑ, ҫитӗнӗвӗсем пирки каласа панӑ. Ҫавӑн пекех тест тӗрӗслевӗ витӗр тухнӑ. Пӗтӗмлетӳ тӑрӑх, "Чи лайӑх специалист" ята Канашри халӑха ӗҫпе тивӗҫтерекен центрти карьера консультанчӗ Оксана Фахрутдинова тивӗҫрӗ. Вӑл ку профессире 16 ҫул, сусӑрсене пулӑшу кӳрет. Пӗлтӗр, тӗслӗхрен, Оксана Васильевна тӑрӑшнипе 43, кӑҫал 21 сусӑр ӗҫ вырӑнӗ тупма пултарнӑ. Ҫавӑн пекех сывлӑх енчен хавшаккисемпе ӗҫлеме ятарлӑ проект та хатӗрленӗ. "Эпӗ вӗсемшӗн куратор та, психолог та, юлташ та," - тет. Ҫавӑн пекех предприятисемпе ҫыхӑнать, вӗсем валли кадрсем тупать. Тӗп ӗҫсӗр пуҫне ятарлӑ ҫар операцине хутшӑнакан салтаксем валли гуманитари пулӑшӑвӗ пухассипе тӑрӑшать. Хальхи вӑхӑтра унӑн мӑшӑрӗ хӗрӳ вырӑнта. Ӗҫлев тата социаллӑ хӳтлӗх министрӗ Алена Елизарова палӑртнӑ тӑрӑх, конкурса хутшӑнакансенчен кашниех хӑйӗн ӑсталӑхне тивӗҫлӗ кӑтартнӑ.
Ҫавӑн пекех халӑха ӗҫпе тивӗҫтерекен чи лайӑх центра палӑртрӗҫ. Ҫӗнтерӳҫӗ ята Комсомольски тӑрӑхӗнчи учреждени ҫӗнсе илчӗ.
Пулӑшу майӗсем анлӑ. Центр урлӑ хушма пӗлӳ илме те, психологпа канашлама та пулать. Цифра технологийӗсене ӗҫе кӗртни вара уйрӑмах меллӗ. Ҫӗнтерӳҫӗсем республикӑри ӗҫпе тивӗҫтерекенсен чысне кӗркунне Мускавра иртекен конкурсра хӳтӗлӗҫ.
Диана Иванова, Екатерина Янгалакова
