Ҫӗртме уйӑхӗн 29-мӗшӗнче пӗтӗм Раҫҫейри пекех Шупашкарта та Ҫамрӑксен кунне анлӑн паллӑ турӗҫ. Иртен пуҫласа каҫчен хулан тӗп лапамӗсем юрӑ-кӗвӗпе, хаваслӑ кӑмӑлпа, усӑллӑ тӗлпулусемпе тулли пулчӗҫ. Хӑйсене хумхантаракан, иккӗлентерекен ыйтусене хӗрсемпе каччӑсем аслӑ юлташӗсемпе тишкерме пултарчӗҫ.
Вӗреннӗ хушӑра тӗрлӗ ӑмӑртура ҫӗнтерсе, проектсем пурнӑҫласа палӑрнӑ 2024-мӗш ҫулти аслӑ шкулсенчен вӗренсе тухакан 100 чи маттур ҫамрӑка ятарлӑ документ парса чысларӗҫ. Сцена ҫине тухма тивӗҫнисем йышӗнче Чӑваш патшалӑх университетӗнче пӗлӳ илнӗ пулас шӑл тухтӑрӗ Сухаиб Шехадех та. Чӑваш Енре темиҫе ҫул пурӑннӑ Палестина каччи пирӗн культурӑпа, чӗлхепе, юрӑ-кӗвӗпе кӑсӑкланма пуҫланӑ.
Чӑваш Енре 5-мӗш хут иртекен "Ҫамрӑк лидерсен ушкӑнӗ" конкурс финалисчӗсене те палӑртрӗҫ уявра. Йӑлана кӗнӗ тӑрӑх ҫулленех ӑслӑлӑхра, литературӑра, сывлӑх сыхлавӗнче, спортра, ытти енӗпе ӗҫлесе курӑмлӑ кӑтартусем патне ҫитнӗ яшсемпе хӗрсене саламларӗҫ. Сумлӑ премие пирӗн ӗҫтеш Алексей Енейкин журналист хальхипе 2-мӗш хут тивӗҫрӗ. Наградӑпа ӑна ҫарпа патриотизм темине тӗпе хурса хатӗрленӗ ятарлӑ репортажсемшӗн чысланӑ.
Премие илнисен йышӗнче Чӑваш патшалӑх университечӗн студенчӗсем чылайӑн. Анастасия Питиримова, сӑмахран, ӑслӑлӑх проекчӗ ҫырса хатӗрленӗшӗн. Аслӑ шкулти кафедра доцентне, медицина наукисен кандидатне Юлия Цыганована та пысӑк проект пурнӑҫланӑшӑн чысларӗҫ. "Чӑваш Ене упрӑр!" пуҫарӑва аталантарнӑшӑн университет хастарӗсен ушкӑнне наградӑпа палӑртрӗҫ. "Сирӗн умра малашне те ҫӗнӗ ҫулсем, ҫӗнӗ майсем уҫӑлса пыччӑр", - палӑртрӗҫ уява пухӑннӑ ҫамрӑксене саламланӑ май сумлӑ хӑнасем.
Алиса Александрова, Михаил Солин
