Патреккел ялӗнче мӗн ачаран хоккейла выляса ӳснӗ Евгений Миллин чылайранпах хӑйӗн хоккей командине йӗркелеме ӗмӗтленсе пурӑннӑ. Шупашкарта тӗпленсен пӗр вӑхӑт тӗп хулари "Ледокол" ушкӑншӑн вылянӑ. Унтан ӗмӗтне пурнӑҫа кӗртме пикеннӗ. Ҫуралса ӳснӗ Елчӗк районӗн сумне ҫӗклес тесе 2017-мӗш ҫулта тӑван тӑрӑхра хоккей ушкӑнне йӗркелесе янӑ. Кӗҫех йыша ытти районпа Шупашкар спортсменӗсем хутшӑннӑ. Ҫапла майпа ҫӗнелнӗ команда Чӑваш Енре мала тухса Сочире иртекен "Каҫхи хоккей лигине" хутшӑнма тивӗҫ пулнӑ.
Лару-тӑру лӑпланасса кӗтнӗ вӑхӑтра елчӗксем каллех Чӑваш Ен ҫӗнтерӳҫисем пулса тӑнӑ. Иртнӗ ҫул вара елчӗксен ушкӑнӗ ҫак турнирта ҫӗнтерес шухӑшпа тата та ытларах вӑй хурса кӑҫалхи лигӑна хатӗрленнӗ. Аслӑ Ҫӗнтерӳ кунӗнче пысӑк шанӑҫпа хӑпартланса спортсменсем инҫе ҫула тухнӑ.
Ҫӗнтерме тӗллев тытнӑ елчӗксен хоккей команди лигӑра 6 регионти чи вӑйлӑ ушкӑнсемпе тупӑшнӑ. Малтанах Тула облаҫӗнчен пынӑ "Ледокол" командӑна парӑнтарнӑ. Унтан ҫитӗнӳпе хавхаланса ҫӑмӑллӑнах Саранскри "Викинг" тата Калугӑри "АСГ" ушкӑнсене ҫӗнтернӗ. Ҫурма финала тухса тепӗр икӗ регион хоккеисчӗсенчен выляса илнӗ. Пиллӗкмӗш вӑйӑра Иркутск командине ҫӗнтерме уйрӑмах йывӑр пулнӑ. Елчӗксен шӑпине хушма шайба ҫапмалли буллитсем татса панӑ. Ҫак пилӗк ҫӗнтерӳ хыҫҫӑн Елчӗк ушкӑнӗ хыҫа юлнӑ кашни вӑййа видео тӑрӑх тепӗр шут шӗкӗлчесе тухса тӗп парнешӗн чи яваплӑ тупӑшӑва кӗнӗ.
Ҫапла майпа Ставрополь тӑрӑхӗнчи пурте шаннӑ "Титан" ушкӑна хирӗҫ кӗрешсе чӑваш паттӑрӗсем 4:2 шутпа "НХЛ" ҫӗнтерӳҫисем пулса тӑнӑ.
"Елчӗк" хоккей ушкӑнӗн ертӳҫи Евгений Миллин Владимир Путин пуҫарнипе 13-мӗш хут иртнӗ хоккей лигинче "Чи лайӑх тренер" ята та тивӗҫнӗ. Сочине Чӑваш Енрен пынӑ тӳресене вӑл - Алексей Протоповичпа Татьяна Митрофанована тата Иван Павлова чунтан тав тунине калать. Ҫавӑн пекех тӑван Патреккел ялӗнчи физкультура учителӗсен: Борис Клементьевпа Юрий Петров умӗнче пуҫне таять.
Умра вара - ҫӗнӗ тӗллевсем. Ытти дивизиона хутшӑнса Чӑваш Ен чысне ҫӗнӗрен те ҫӗнӗ хоккей лигисенче ҫӗнтересси. Эпир вӗсене ӑнӑҫу сунатпӑр.
Алексей Енейкин, Димитрий Макаров
