Ҫакӑн йышши ӑмӑртӑва ҫӑлавҫӑсем ҫулсерен йӗркелеҫҫӗ. Тупӑшӑва хутшӑнакансем валли чӑн пурнӑҫри пек чӑрмавсем йӗркеленӗ. Ку службӑра тӑракансем тӗтӗмпе тулнӑ ҫуртсенче ӗҫлеҫҫӗ, ҫавна май вӗсем 40 килона яхӑн таякан ятарлӑ тум тӑхӑнаҫҫӗ. Вӗсен тӗп тӗллевӗ - ҫулӑмпа тӗтӗм тыткӑнне лекнисене ҫӑласси, пушара сӳнтересси. Хӑйсен ӑсталӑхне хастарсем виҫӗ тапхӑрпа кӑтартрӗҫ.
Пӗр тапхӑрӗнче ҫӑлавҫӑсен виҫҫӗмӗш хутри хваттерте алхасакан вут-ҫулӑма парӑнтарма тиврӗ. Малтанах вӗсем унта лексе ҫынна эвакуацилерӗҫ. Пушара хирӗҫ кӗрешекенсен хӑвӑрт та пӗлсе ӗҫлемелле - тӗтӗмлӗ ҫӗртре кислород хӑвӑрт пӗтет. Ҫакна та шута илмелле.
Ӑмӑртусен пӗтӗмлетӗвӗ тӑрӑх "чи лайӑххи" ята Шупашкарти ятарлӑ пушарпа ҫӑлав чаҫӗн ушкӑнӗ тивӗҫрӗ. Вӗсем ҫӗртме уйӑхӗнче республика чысне Оренбургра иртекен Атӑлҫи федераци округӗнчи конкурсра хӳтӗлӗҫ.
Оксана Верликова, Александр Отяков, Андрей Шоклев
