Ӗмӗртен килекен йӑлапа Акатуя пуҫтарӑннисем чи малтан "Халӑхсен туслӑхӗ" ятлӑ фонтан тавра аслӑ вӑйӑ картине тӑчӗҫ. Ку ӗнтӗ эпир те, уҫлӑхри ҫӑлтӑрсем пек, ҫураҫулӑхра пурӑннине, тӳперен, уйӑхран-хӗвелтен ырӑ ҫанталӑк ыйтса, пӗр-пӗринпе алла-аллӑн килӗштерсе ӗмӗр ӗмӗрлес тенине пӗлтерет. Культура программи харӑсах халӑх хуҫалӑхӗн ҫитӗнӗвӗсен куравӗн 5 лапамӗнче пычӗ. Уява уҫса Чӑваш Республикин Пуҫлӑхӗ Олег Николаев хӑнасене саламларӗ.
"Хамӑр халӑхӑн ырӑ йӑлисене тытса пыни пире паян та аталанма пулӑшать. Кӑҫалхи йывӑр ҫул, ҫурхи ака-суха ӗҫне самай кая юлса тухма тиврӗ пулсан та, эпир палӑртса хунӑ тӗллевсене вӑхӑтра тата ӑнӑҫлӑ пурнӑҫа кӗртрӗмӗр, тухӑҫа ҫулран-ҫул ӳстерсе пыратпӑр", - терӗ Чӑваш Ен ертӳҫи. Артистсем пирӗн асаттесем Ҫӗр-аннене, Аслӑ Турра мӗнле тав туса кӗлӗ каланине кӑтартса пачӗҫ.
Ҫӗршывӑн тӗрлӗ кӗтесӗнчен килнӗ чӑваш ансамблӗсем, фольклор ушкӑнӗсем янкӑс сассипе ян! янратрӗҫ Мускава. Темиҫе кун шалкӑм ҫумӑр айӗнче пурӑннӑ хулана хӗвел таврӑнчӗ те - тухья-хушпу тенки ҫинче вӑй вылять. Пирӗн республикӑри мӗнпур театрсемпе концерт организацийӗсем, филармони коллективӗсем халӑхӑн чи паха юрри-ташшипе, йӑла-йӗркепе, наци вӑййисемпе паллаштараҫҫӗ курма килнисене.
Акатуй хӑнисене чӑваш наци апат-ҫимӗҫӗпе сӑйларӗҫ, маҫтӑрлӑх урокӗнче вӗсене хатӗрлес вӑрттӑнлӑхсене вӗренме те май пулчӗ. Ал ӗҫ ӑстисен сӗтелӗсем ҫинче - куҫа алчӑратакан илем: мӑй ҫыххисемпе теветсем, алкасемпе сулӑсем ҫамрӑксемшӗн те илӗртӳллӗ. Пурте ҫак савӑнӑҫлӑ куна астуса пурӑнмалӑх чӑваш эрешӗллӗ пӗр-пӗр япала туянасшӑн.
Акатуй нихҫан та спорт ӑмӑртӑвӗсемсӗр иртмест. Хальхинче те паттӑрсем кӗрешсе вӑй виҫрӗҫ, тӗрлӗ виҫере ҫӗнтерӳҫӗсене палӑртрӗҫ. Ҫӗршыври 200-е яхӑн чӗлхепе калаҫакан тӗрлӗ халӑх хушшинче йышӗпе пиллӗкмӗш вырӑнта тӑракан чӑвашсем Раҫҫей варринче ҫакӑн пек шайлӑ туслӑх уявӗ ирттерни - пуриншӗн те тӗслӗх. "Пӗрлӗхре - вӑй", тенӗ пирӗн шурсухалсем. Ҫак ӑслӑ сӑмахсен пӗлтерӗшне эпир паян нихҫанхинчен ытла туятпӑр.
Тӑван халӑх ятне малалла ҫӗклеме ҫӗнӗ вӑй пухса саланчӗҫ Акатуй хӑнисем. Килес ҫул ҫак вырӑнтах тепӗр хут тӗл пулма калаҫса татӑлчӗҫ.
Марина Карягина, Денис Пахмутов, Виктор Степанов
