Акатуйра чӑваш халӑхӗн кун-ҫулӗпе йӑли-йӗркине, ӗҫ-хӗлне сӑнлакан 5 лаптӑк ӗҫлерӗ. Вӗсенчен пӗринче паттӑрсем хӑйсен вӑйне кӗрешӳре кӑтартрӗҫ. Уҫӑ турнира Владимир, Чулхула, Самар, Чӗмпӗр облаҫӗсенчен, Кабардин-Балкар, Тутарстан, Чӑваш Республикисенчен тата Мускав хулинчен 52 спортсмен хутшӑнчӗ. Вӗсем наградӑсемшӗн 4 виҫе ушкӑнӗнче тупӑшрӗҫ.
Паянхи куна тӗнчере 70 ытла кӗрешӳ тӗсӗ аталанса вӑй илнӗ. Вӗсенчен ытларах пайӗ Раҫҫейре. Ахальтен мар ӗнтӗ чӑвашсен наци кӗрешӗвӗ культура еткерӗ шутланать. Ҫавӑнпа та ҫак спорт аталанӑвне юлашки ҫулсенче республикӑра пысӑк тимлӗх уйӑраҫҫӗ. Чӑваш ҫӗрӗ ҫинче тӗнче шайӗнчи ӑмӑртусене ирттереҫҫӗ, спортсменсемпе тренерсене хатӗрлеҫҫӗ, палӑртрӗ Республика Пуҫлӑхӗ Олег Николаев.
Турнирпа ятлӑ-сумлӑ спортсменсем те кӑсӑкланчӗҫ. Вӗсен йышӗнче икӗ хут Олимп чемпионӗ Роман Власов тата Олимп вӑййисен бронза призерӗ Сергей Корнилаев пулчӗҫ. Финала тухнисем хушшинче тупӑшу хӗрӳ иртрӗ. Кӗрешӳ кавирӗ ҫинче пысӑк опытлӑ тата тӗрлӗ шайри ӑмӑртусене хутшӑннӑ ӑстасем тӗл пулчӗҫ. 70 кило таякансем хушшинче Мускав каччи Алексей Никитиных маттур пулчӗ. 80 килоллисен ушкӑнӗнче чӑваш каччи Булат Тумаков ҫӗнтерчӗ. 90 килоллисен категорийӗнче Чулхула облаҫӗн спорстменӗ Камиль Хайретдинов мала тухрӗ. 90 килоран ытларах таякансем хушшинче вара Елчӗк каччине Евгений Абрамова ҫитекенни пулмарӗ.
Ҫӗнтерӳҫӗсене укҫан преми, Кубок, медаль тата диплом парса хавхалантарчӗҫ.
Леонид Петров
