Геннадий Волков Чӑваш наци конгресӗнче кӗтнӗ хӑна. Чылай ҫул Мускавра инженерта ӗҫленӗ хыҫҫӑн 27 ҫул Ҫӗнӗ Зеландире пурӑнать вӑл. Лӑпкӑ океанри утрав ырлӑхӗнче киленнӗ май, Совет союзӗнчи пурнӑҫа аса илсе иртнӗ ҫул кӗнеке те кӑларнӑ. Халӗ унӑн аудиовариантне хатӗрлет. Чун тӑван тӑрӑхах туртнине калать Геннадий Петрович. Ҫӗмӗрле тӑрӑхӗнчи Кӗҫӗн Тӑван ялӗнче ҫуралса ӳснӗскер тӑван культурӑпа кӑсӑкланать, халӑх пуянлӑхне тӗпчет.
Конгресс президенчӗ Валерий Клементьев, унӑн канашлуҫи Иван Павлов тата пӗрлешӗвӗн Владивостокри пайташӗ Андрей Малышев Геннадий Волковпа пӗрле тума палӑртнӑ тӗллевсене сӳтсе яврӗҫ. Аякри континентран килнӗ хӑнана парнесем пачӗҫ. Геннадий Петрович Ҫӗнӗ Зеландире ытти чӑвашсене те хӑй тавра пухма пуҫланине пӗлтерчӗ.
Алексей Енейкин
