Театр коллективӗ куракансем умне 8 премьера кӑларма палӑртать. Сезон "Салампи" спектакльпе уҫӑлӗ. Ҫакӑн валли Александр Артемьевӑн хайлавне ӑнсӑртран мар суйласа илнӗ - автор ҫуралнӑранпа 100 ҫул ҫитет. Ку произведение халӑх та юратать, шкул программине те кӗртнӗ. Юбилейсене илес пулсан, авӑн уйӑхӗн 25-мӗшӗнче театрӑн илемлӗх ертӳҫи, СССР халӑх артисчӗ Валерий Яковлев 85 ҫул тултарӗ.
Андриян Николаев ҫуралнӑранпа 95 ҫул ҫитнине халалласа вара ку уйӑхри афишӑна спектакль-концерт премьерине кӗртнӗ. Ҫитес ҫул та ҫавра ҫулсемпе пуян. Константин Иванов ҫуралнӑранпа 135 ҫул ҫитет. Ҫавӑнпа та сцена ҫине "Нарспи" спектакль кӑларма планлаҫҫӗ. Унсӑр пуҫне Александр Грибоедов "Горе от ума" пьесине ҫырнӑранпа 200 ҫул ҫитет.
Авӑн уйӑхӗн вӗҫӗнче Чӑваш драма театрӗн сцени ҫинче Ӗпхӳри "Нур" патшалӑх тутар театрӗн гастролӗсем иртеҫҫӗ. Пушкӑрт артисчӗсем виҫӗ спектакль хаклама сӗнеҫҫӗ. Театрӑн ертӳҫи Фирзат Габидуллин палӑртнӑ тӑрӑх, ку ҫӳреве Раҫҫей культура министерствин проекчӗпе килӗшӳллӗн йӗркелеме май килнӗ. Пӗлтӗр вара пирӗн артистсем ҫапла майпа Ӗпхӳри куракансемпе тӗл пулнӑччӗ. Академи драма театрӗнче кадрсем хатӗрлесси пирки те шутлаҫҫӗ. Ҫӗнӗ артистсем тата режиссерсем вӗрентсе кӑларас тӗллевпе ГИТИСпа тата Щукин ячӗллӗ институтпа ҫыхӑну тытаҫҫӗ.
Пӗтӗмӗшле илсен Чӑваш драма театрӗ пултарулӑх сезонне хавхалануллӑ кӑмӑлпа кӗтсе илет.
Надежда Александрова, Михаил Солин
