Юлия Галай - 5 ача амӑшӗ. Ҫавӑн пекех вӑл арт-студи ертсе пырать, ачасемпе аслисем валли ӑсталӑх урокӗсем ирттерет, стенасене ӳкерсе илемлетет. "Пӗччен пӗтӗмпех ӗлкӗрме ҫӑмӑл мар, мӑшӑр тӗрев парса пыни пулӑшать", - тет Юлия. Хӗрарӑм "Анне-предприниматель" проекта хальччен те хутшӑннӑ. Пӗлӳ панисӗр пуҫне программа пӗр шухӑшлисене тупма пулӑшнине калать вӑл. Екатерина Александрова Шупашкарта коворкинг уҫнӑ. Унӑн тӗллевӗ хӑйсен ӗҫӗпе аппаланас текенсем валли хӑтлӑ кӗтес йӗркелесси пулнӑ. Усламҫӑ 2 ача ӳстерет. Икӗ пӗлтерӗшлӗ ӗҫе шайлаштарса пыма ҫӑмӑлах мар. Тӑрӑшсан вара майне тупма пулать.
Декретри Валентина Максимова чунӗнче те хавхалану ҫӑлкуҫӗ тапса тӑрать. Ача амӑшӗн вӑхӑтне нумай йышӑнать пулин те, чун киленӗҫӗ валли те вырӑн пур ун пурнӑҫӗнче. Пӗр кӑсӑклантарса янӑ ӗҫпе малаллах аталанасшӑн хӗрарӑм.
Автомобиль ларкӑчӗсен виттисем, апат-ҫимӗҫ пуххисем, ытти тӗрлӗ япала тӑваҫҫӗ проекта хутшӑнакансем. Аталану ҫул-йӗрӗ кашнин тӗрлӗрен. 5 кун хастарсемшӗн тухӑҫлӑ иртмелле. Экспертсем туянакана епле тупмаллине, суту-илӗве мӗнле йӗркелемеллине каласа кӑтартаҫҫӗ. Бизнесри хӗрарӑмсем хӑйсен проекчӗсене хӳтӗлеме хатӗрленӗҫ. Чи ӑнӑҫлин авторне ӗҫне аталантарма 100 пин тенкӗ грант парӗҫ. Ҫавӑн пекех ҫӗнтерӳҫӗ Чӑваш Ен чысне Раҫҫей шайӗнчи "Анне-предприниматель" конкурсра хӳтӗлӗ. Республикӑра проект 6-мӗш хут иртет. Ҫак хушӑра унта 200 ытла хастар хӗрарӑм хутшӑннӑ. Чылайӑшӗ вӗренӳ курсӗ вӗҫленсен те пӗр-пӗрне пулӑшса пырать.
Алиса Александрова, Надежда Давыдова, Андрей Шоклев.
