Кӑҫал ҫурла уйӑхӗн 21-мӗшӗнче Геннадий Айхи ҫуралнӑранпа 90 ҫул ҫитет. Наци библиотеки ҫак ятпа ирттерекен ӗҫсен ярӑмне ҫулталӑк пуҫламӑшӗнчех пуҫарса янӑ: "Лукойл" Ыркӑмӑллӑх фончӗн грантне ҫӗнсе илнӗ, кӗнеке хӑтлавӗсем, пысӑк курав, Асӑну каҫӗ ирттернӗ, вулавӑшри Айхи залне пуянлатнӑ, ҫамрӑксем хушшинче пултаруллӑ сӑвӑҫсене палӑртас тӗллевпе ӑмӑрту йӗркеленӗ. Залра - шӑпах ҫав "ГолосА" конкурса хутшӑннӑ яш-кӗрӗмпе Геннадий Айхин поэзине кӑмӑллакансем. Поэтӑн Вероника хӗрӗ хӑйӗн "Хористки" ушкӑнӗпе ашшӗн Атӑлҫи халӑхӗсен юррисене тӗпе хурса хайланӑ "Поклон - пению" кӗнеки тӑрӑх фестиваль тӗлне ятарласа лартнӑ спектакль кӑтартрӗ.
"Спектакльпе хавхаланса ӗҫлерӗм, мӗншӗн тесен аттешӗн эпӗ чӑваш тӗнчекурӑмӗпе, ҫавӑн пекех кӳршӗри ытти халӑхсен культурипе паллашни мӗн таран пысӑк пӗлтерӗшлӗ пулнине пӗлетӗп. Тарӑна кӗрсе тӗпченипе аттене те лайӑхрах ӑнланма пуҫларӑм", - тет Вероника Айхи. Ева Лисина ҫыравҫӑ, поэтӑн тӑван йӑмӑкӗ, спектакльпе кӑмӑллӑ: вӑл ӑна тетӗшӗн куҫӗпе пӑхрӑм, тет.
Пухӑннисем Александр Осипов композитор Айхи сӑввисемпе ҫырнӑ хайлавне те хапӑлласа йышӑнчӗҫ. 5 триоран тӑракан сюита - ҫинҫе сасӑ, сӗрме купӑс тата фортепьяно валли. Александр Аркадьевича тӗнчипех палӑрнӑ чӑваш поэчӗн сӑввисем тахҫантанпах хавхалантараҫҫӗ. Иртнӗ ӗмӗрӗн 90-мӗш ҫулӗсенче Бельман швед классикӗн юрланакан сӑввисене чӑвашла тӗрӗс янӑратас енӗпе те ӗҫленӗ вӑл, романссем те хайланӑ. Айхин вырӑсла ҫырнӑ авангардла сӑввисене кашни ҫӑмӑллӑн ӑнланса йышӑнаймасть, Осипов вара вӗсене чӗри витӗр кӑларса сюита кӗвӗленӗ.
Геннадий Айхи ҫуралнӑранпа 90 ҫул ҫитнине халалланӑ уявсем ҫурла уйӑхӗнче малалла тӑсӑлӗҫ.
Марина Карягина, Екатерина Янгалакова
