Асатте-асаннесен йӑлине сӳнме памасӑр тӑван халӑх ҫипуҫӗпе вӑййа тухса савӑнакан ҫамрӑксем ҫине пӑхса ытарма та ҫук. Ҫак куҫ тулли савӑнӑҫа Республикӑри халӑх пултарулӑх центрӗ йӗркелет.
Фольклор уявне пуҫласа 2020-мӗш ҫулта ирттернӗ. Тӗрлӗ тӑрӑхри пултарулӑх ушкӑнӗсем Патӑрьел, Каҫал тата Вӑрнар тӑрӑхӗнче пухӑннӑ. Ытларах унта аслӑ ӳсӗмри коллективсем хутшӑннӑ. Кӑҫал вара 4-мӗш хут иртекен фольклор кунне ҫамрӑксене явӑҫтарма шутланӑ.
Фестивале хутшӑнакан ушкӑнсем Канаш, Вӑрнар, Елчӗк тӑрӑхӗсенчен тата Шупашкар хулинчен килсе ҫитрӗҫ. Хӑнасене Тури Ачакри "Чӑваш хресчен хуҫалӑхӗн музейӗ" хапӑл турӗ. Малтанах ҫамрӑксемпе экскурси йӗркелерӗҫ. Несӗлсен кил-ҫурчӗпе хуҫалӑхри хуралтӑ пӳрчӗсемпе тата вӗсенче упранакан ӗҫ хатӗрӗсемпе паллаштарчӗҫ. Унтан пухӑннисене Лев Иванов ертсе пыракан "Выйкӑт" ҫемье фольклор ансамблӗ савӑнтарчӗ. Вӗсемех ҫамрӑксемпе тӗрлӗрен ӑсталӑх сехечӗсем йӗркелерӗҫ. Арҫын ачасене ҫава туптама, шӑпӑрпа тата ытти шӑхлич тавраш кӗвӗ хатӗрӗсемпе калама вӗрентрӗҫ. Хӗрсем вара хуҫа тӗпелӗнче юрла-юрла хуран кукли ҫупрӗҫ.
Тараватлӑ та ӑста ҫамрӑксене Людмила Петухова ертсе пыракан "Янтал" ушкӑн та хӑйӗн пултарулӑхӗпе паллаштарчӗ. Шупашкарти музыка училищинче йӗркеленнӗ фольклор ансамблӗ пуриншӗн те тӗслӗх вырӑнӗнче пулчӗ.
Фольклор уявне ҫамрӑксем ҫине пусӑм туса ирттерни уйрӑмах паха. Тӗрлӗ тӑрӑхран ҫитнӗскерсем хӑйсен пултарулӑхӗпе 3 конкурсра тупӑшса паллаштарчӗҫ. Пӗрле карталанса вӑйӑ-кулӑра савӑнчӗҫ.
Ҫак пархатара ырлама ытарлӑ сӑмах та ҫитмӗ. Вӑрнарти "Хӑват", Канашри "Укӑлча" тата Шупашкарти "Пилеш" ушкӑнсем тӗрлӗ номинаци ҫӗнтерӳҫисем пулчӗҫ. Елчӗкрен килнӗ шкул ачисен "Тарават" ушкӑнӗ вара фестивалӗн тӗп парнине тивӗҫрӗ.
Ҫитес ҫул пулакан 5-мӗш фольльклор уявне йӗркелӳҫӗсем тата та пысӑк йышпа ирттерме палӑртаҫҫӗ. Пултаруллӑ ҫамрӑксен ушкӑнӗсене вара республикӑри аслӑ сценӑсем ҫинче те курма пултарӑпӑр.
Алексей Енейкин
