Платон Давыдов 30 ҫул ытла "Ударник" хуҫалӑха ертсе пынӑ, Муркаш тӑрӑхӗн аталанӑвне пысӑк тӳпе хывнӑ. Ӑна асӑнса ирттерекен волейбол турнирӗн пӗлтерӗшӗ те 10 ҫул хушшинче чылай ӳснӗ.
Ӑмӑртӑвӑн сумӗ пысӑк пулнине хутшӑнакансен шучӗпе те хаклама пулать. Кӑҫалхи турнирта 10 ушкӑн вӑй виҫрӗ. Вӗсенчен виҫҫӗшӗ: "Моргауши", "Оринино" тата "Москакасы" командӑсем - Муркаш тӑрӑхӗнчисем. Парнесен фончӗ -150 пин тенкӗ.
"Оринино" ушкӑнри хастарсем тӑрӑшрӗҫ пулин те медале тивӗҫеймерӗҫ. Ҫапах та турнир хуҫисем те хӑйсен вӑйне кӑтартрӗҫ. "Моргауши" команда Мари Элтан килнӗ хӑнасене парӑнтарма пултарчӗ. Йошкар-Олари спортсменсем турнира пӗрремӗш ҫул мар хутшӑнаҫҫӗ, ылтӑн медале те тивӗҫнӗ. Финалта вара "Моргауши" тата Шупашкарти "Лава" ушкӑнсем вӑй виҫрӗҫ. 2 : 1 шутпа ҫӗнтерсе Кубока тӗп хулари команда тивӗҫрӗ. Халӗ вӑл волейбол енӗпе Раҫҫей чемпионачӗн пӗрремӗш лигинчи ӑмӑртусене хутшӑнать. Вӑйӑсем юпа уйӑхӗн 19-мӗшпе 20-мӗшӗнче Чӗмпӗрте иртеҫҫӗ.
Диана Иванова, Вячеслав Ильин
