Шавласа юхакан аслӑ Енисей шывӗ хӗрринче тӗпленнӗ чӑвашсем кашни ҫулах Казачинск ялӗнче тӗрлӗ уяв йӗркелеҫҫӗ. Ҫуркунне - тӑван чӗлхепе культура уявне, ҫӑва тухсан Акатуй ирттереҫҫӗ, кӗркунне вара Чӳклемене пухӑнаҫҫӗ.
Хӗрлӗ Яр тӑрӑхӗнчи чӑвашсен наципе культура автономийӗ регионти ытти халӑхсен хушшинче ырӑ тӗслӗхпе ҫеҫ палӑрать. Пӗрлешӳ ертӳҫи Геннадий Храмов пайташсемпе яланах тачӑ ҫыхӑнура пулса пурне те хавхалантарса пырать. Хастарсем ҫулталӑкра сахалтан та 3-4 хут пысӑк йышпа пухӑнса тӑван халӑх умӗнчи пӗрлехи ӗҫсене палӑртаҫҫӗ. Вӗсене пурнӑҫа кӗртессипе тӑрӑшаҫҫӗ. Чи пӗлтерӗшлӗ пулӑмсенчен пӗри, шӑпах - тӑван чӗлхе кунӗ.
Ҫакӑн евӗр уявсене ҫитӗнекен ӑрӑва явӑҫтарни темрен те паха. Тӗрлӗ ӳсӗмри ачасем ирӗккӗнех чӑвашла сӑвӑсем калаҫҫӗ, юрӑсем шӑрантараҫҫӗ.
Уяв йӗркелӳҫисем пухӑннисемпе тӑван чӗлхе урокӗ ирттерчӗҫ, Иван Яковлев кун-ҫулӗпе паллаштарса унӑн тӑван халӑх умӗнчи пархатарлӑ ӗҫӗсем пирки каласа кӑтартрӗҫ. Пултарулӑх ушкӑнӗсем вара халӑха концерт парнелерӗҫ.
Тӑван культурӑна аталантарас ӗҫре ертӳҫӗсем влаҫпа килӗшӳре пулни тата пурте пӗр утӑмпа утни паха. Вырӑнти пуҫлӑхсемпе депутатсем автономи ӗҫне пысӑка хурса чӑвашсене яланах алӑ парса пыма хатӗр пулнине каларӗҫ.
Тӑванлӑх уявӗнче Красноярск тӑрӑхӗнчи чӑвашсен автономийӗн малтанхи ертӳҫи пулнӑ Владимир Мешковӑн ҫавра ҫулне халалланӑ курав та уҫӑлчӗ. Унта Раҫҫей халӑх ӳнерҫин 15 ӗҫӗпе паллашма пулать. Вӗсене ӳнерҫӗ хӑй 90 ҫул тултарнӑ чух Геннадий Храмова парнеленӗ пулнӑ. Владимир Ильичӑн сӑрӑллӑ ӗҫӗсенче ҫурҫӗр халахӗсен йывӑр пурнӑҫӗпе куҫа тыткӑнлакан ҫут ҫанталӑк пуянлӑхӗ сӑнарланнӑ. Ҫак гравюрӑра вара Фидель Кастро та пур. Пӗррехинче вӑл чӑваш ӳнерҫи патне ятарласа Ҫӗпӗре килнӗ. Иккӗшӗ ҫапла тайга тӑрӑх та уҫӑлса ҫӳрене. Кунтах чӑваш кӗнекин тата "Тӗнче пирӗштийӗсем" ятлӑ арт-проекта халалланӑ курав уҫӑлчӗ. Казачинскри культура керменӗ пурне те хапӑлласа йышӑнать.
Алексей Енейкин, Александр Герасимов
