Зоя Никонорова ҫак кунсенче салам хыҫҫӑн салам йышӑнать. Тӑванӗсем, юлташӗсемпе пӗлӗшӗсем ветерана канӑҫ пами шӑнкӑравласа тата хӑнана килсе саламлаҫҫӗ. Тӑван культура аталанӑвӗнчи тивӗҫӗсене аса илсе чунтан тав тӑваҫҫӗ. Зоя Сергеевна Элӗк тӑрӑхӗнчи Мӑн Карачура ялӗнче ҫуралса ӳснӗ. Шупашкара килсе 20 ҫултах Пукане театрӗн артисчӗ пулса тӑнӑ.
Пултаруллӑ хӗре яланах тӗп сӑнарсене калӑплама шаннӑ. 67-мӗш ҫултанпа Зоя Никонорова Чӑваш телевиденийӗнче ӗҫлеме пуҫланӑ. Кунта та унӑн тӗп ӗҫӗ ача-пӑча передачисене кӑларасси пулнӑ. Режиссер тата режиссер пулӑшаканӗ пулса ҫитӗнекен ӑру валли спектакльсем лартнӑ вӑл. Вӗсенче хӑйех артистла та вылянӑ. Ӗҫпе вӗренӗве шайлаштарса аслӑ пӗлӳ илнӗ. Телевиденирех мухтавлӑ ҫынсем ҫинчен ӗмӗрлӗх халӑх асӗнче юлма тивӗҫлӗ телепередачӑсем эфира кӑларнӑ. Ҫав вӑхӑтрах радиора та тӑрӑшнӑ. 18 ҫул шӑпӑрлансене валли "Шӑнкӑрав" кӑларӑм хатӗрлесе ертсе пынӑ. Актер ӑсталӑхӗпе ытарлӑн усӑ курса ҫепӗҫ те чунлӑ "Асанне юмахӗ" кӑларса тӑнӑ. Республикӑри паллӑ уявсене ҫутатнӑ чух тӳрӗ эфирта диктор пулса ӗҫленӗ. Тивӗҫлӗ канӑва тухсан та Зоя Сергеевна Пукане театрӗнче педагогра тӑрӑшнӑ. Халӗ те 90 ҫулти ветеран ҫамрӑк ӗҫтешӗсен пултарулӑхӗпе кӑсӑклансах тӑрать. Ҫак сӑмахсене шута илсе хисеплӗ юбиляра эпир ҫирӗп сывлӑх тата вӑрӑм ӗмӗр сунатпӑр.
Алексей Енейкин, Виктор Степанов
