Унӑн ырӑ ӗҫӗ малалла пурӑнӗ

Республикӑра РСФСР тава тивӗҫлӗ строителӗпе, Чӑваш Республикин тата Шупашкар хулин хисеплӗ ҫыннипе Евгений Тертышныйпа сыв пулашрӗҫ. Унӑн чӗри иртнӗ эрнекун тапма чарӑннӑ.

Евгений Алексеевич Тертышный 1935-мӗш ҫулхи нарӑс уйӑхӗн 22-мӗшӗнче Курган облаҫӗнчи Шадринск хулинче ҫуралнӑ. Саратоври автомобильпе ҫул-йӗр институтне вӗренсе пӗтернӗ хыҫҫӑн ӑна Шупашкар хулине ӗҫлеме янӑ.

Вӑл ҫур ӗмӗр ытла республикӑн строительство тытӑмӗнче вӑй хунӑ. Мастертан пуҫласа ертӳҫӗ таран ӳссе ҫитнӗ. Тӗрлӗ вӑхӑтра регионти строительство предприятийӗсене ертсе пынӑ. Вӑл тӑрӑшнипе пӗлтерӗшлӗ объектсем хута янӑ, ҫӗнӗ технологисене ӗҫе кӗртнӗ.

Тивӗҫлӗ канӑва кайма вӑхӑт ҫитсен та Евгений Тертышный ӗҫлеме пӑрахман. Вӑл "СУОР", "Чувашстрой", "Монолитстрой" предприятисенче вӑй хунӑ. Регионӑн общество тата политика пурнӑҫне хастар хутшӑннӑ. Мӗн пурнӑҫран уйрӑличчен строительство тытӑмӗн сумлӑ эксперчӗ пулнӑ. Унӑн шухӑшӗпе сӗнӗвӗсене Строительство министерствинче, хула администрацинче яланах шута илнӗ.

Чӑваш Республикин строительство тытӑмне аталантарассине пысӑк тӳпе хывнӑшӑн Евгений Алексеевич патшалӑх наградисене тивӗҫнӗ.  Унӑн ырӑ ӗҫӗ малалла пурӑнӗ.

 

Оксана Верликова, Вадим Владимиров