Кашнин - тӗрлӗрен нуша. Хӗрлӗ Чутай тӑрӑхӗнчи Сӗнтӗкҫырми ялӗнче пурӑнакан Ольга Сергеева шыв кӗртес ыйтупа ҫитнӗ. Кун пирки округра унччен те калаҫнӑ пулнӑ. Апла пулин ӗҫ малалла кайман. Шыв ыйтӑвӗ ҫаплипех ҫивӗч. Регион ертӳҫи Сӗнтӗкҫырми ялне шыв кӗртессине республикӑн 2025-2027-мӗш ҫулсенчи адреслӑ инвестици программинче пӑхса хунине палӑртрӗ. Ҫавӑнпа та ку ыйту ҫывӑх вӑхӑтра татӑлмалла, терӗ.
Канаш тӑрӑхӗнчи Светлана Васильева вара Вӑта юханшывӗ урлӑ кӗпӗр тума ыйтать. Унчченхи тахҫанах ишӗлсе пӗтнӗ. Каҫӑ ҫукки Шаккӑл ялӗнче пурӑнакансемшӗн уйрӑмах чӑрмавлӑ. Ҫӗнӗ кӗпер проектне хатӗрлеме кӑна 7 миллион тенке яхӑн кирлӗ. Олег Николаев ыйтӑва асӑрхаса тӑма шантарчӗ. Документсене ҫитес ҫулла валли хатӗрлессине каларӗ.
Шупашкар тӑрӑхӗнчи Толик Хураскинчи вӑтам шкулта кӗҫӗн классене вӗрентекен Любовия Иванова ҫул хӗррипе тротуар сарсан питӗ аванччӗ, тет. Ку автоҫула йӗркене кӗртме проектпа смета документацине ҫулталӑк вӗҫлениччен хатӗрлемелле. Унта тротуар та, чарӑну вырӑнӗсемпе стоянка та пӑхса хунӑ. Йышӑнура пӗтӗмпе 7 ҫын пулчӗ. Республика Пуҫлӑхӗ кашни ыйтӑва татса пама пулассине каларӗ.
Диана Иванова, Борис Андреев
