Ҫулталӑкне нумай хваттерлӗ 2 ҫуртран ытла мар тӑвакан хуласенче ҫӑмӑллатнӑ ипотека 6 процентпа илме юрать. Ҫак пулӑшупа 6 ҫулчченхи ачаллӑ пур ҫемье те усӑ курма пултарать. Ку ипотекӑна пӗрре кӑна илме май пур. Хваттер туянакан ҫурт вара 20 ҫултан ытла пулмалла мар.
Паянтан социаллӑ пенсие 15 процент индексацилеҫҫӗ. Вӑл страхлав пенсине илсе тӑманнисене тата ҫемьене тӑрантаракана ҫухатнисене пырса тивӗ. Ҫавӑн пекех Тӑван Ҫӗршывӑн Аслӑ вӑрҫин ветеранӗсене, Ленинград блокадине тӳссе ирттернисене, техногенлӑ инкексене сирме хутшӑннисене паракан тӳлев те ӳсӗ.
Паянтан ҫыхӑну ҫинчен калакан федераци саккунне те улшӑнусем вӑя кӗреҫҫӗ. Унпа килешӳллӗн пӗр ҫыннӑн 20-рен ытла сим-карта пулма пултараймасть. Операторсем ҫӗнӗ килӗшӳ тӑвиччен маларах регистрациленӗ номерсене тӗрӗслӗҫ. Харпӑр хӑй ҫинчен ҫак информацие кашниех патшалӑх пулӑшу ӗҫӗсен порталӗнче тупма пултарӗ.
Ҫӗнӗлӗхсем водительсене те кӗтеҫҫӗ. Урӑх ҫӗршыв ҫыннисем ака уйӑхӗн 1-мӗшчен Раҫҫей гражданствине илнӗ пулсан, вӗсен водитель удостоверенине пирӗн ҫӗршыврипе улӑштармалла. Ҫакӑн валли, паллах, экзамен тытмалла пулать. Чӑн та, ҫак ҫӗнӗлӗх Беларуҫре илнӗ правасене пырса тивмест. Вӗсемпе пирӗн ҫӗршывра та чӑрмавсӑрах усӑ курма юрать.
Ака уйӑхӗн 1-мӗшӗнчен ют ҫӗршыв ачисен шкула вӗренме кӗриччен, вырӑсла пӗлнине ҫирӗплетмелле. Тест евӗр иртекен тӗрӗслев 80 минут пырать. Енчен те ача тӗрӗслев витӗр тухаймасан, ӑна пӗлӗве ӳстермелли курс сӗнеҫҫӗ. Унтан вара 3 уйӑхран тӗрӗслеве тепӗр хут тухмалла пулать.
Диана Иванова
