Хайсен куҫ ҫивӗчлӗхне тата алӑ ҫирӗплӗхне тупӑшура репортерсемпе корреспондентсем, хаҫат редакторӗсем тата студентсем кӑтартрӗҫ. Малтанах пӑшалпа мӗнле усӑ курассипе инструктаж ирттерчӗҫ. Ӑмӑртакансем мишене 25 метртан 9 хут печӗҫ. Кун пек тупӑшӑва массӑллӑ информаци хатӗрӗсем хушшинче пӗрремӗш хут йӗркелерӗҫ. Апла пулин те хутшӑнакан чылай пулчӗ. Хӑйсен редакцисен чысне 40 ытла ҫын хӳтӗлерӗ. Ҫакнашкал спорт уявӗсем пӗрлештереҫҫӗ, терӗҫ ӑмӑртӑва хутшӑнакансем.
Чӑваш патшалӑх телерадиокомпанийӗн ушкӑнӗнче Дарья Петрова, Денис Пахмутов тата Александр Отяков корреспондентсем пулчӗҫ. Вӗсем ушкӑнпа малтисен йышне кӗреймерӗҫ пулин те, япах мар кӑтартусемпе палӑрчӗҫ.
Ӑмӑрту пӗтӗмлетӗвӗпе 3-мӗш вырӑна "Чувашинформ" информаци агенствинче ӗҫлекенсем йышӑнчӗҫ. 2-мӗшне - Чӑваш Ен медиацентрӗн журналисчӗсем. Ҫӗнтерӳҫӗ ята вара Наци телерадиокомпанийӗн ушкӑнӗ тивӗҫрӗ.
Диана Иванова, Дарья Петрова, Игорь Ульянов
