Республикӑн тӗрлӗ кӗтесӗнчен 80 ытла ҫемье Йӑлӑма пухӑнчӗ. Пурте пултаруллӑ та хастар. Тӑвай тӑрӑхӗнчен ҫитнӗ Степановсем тӗрлӗ фестиваль-конкурса хаваспах хутшӑнаҫҫӗ. Туриадӑран та юлас темен.
Ачасем валли тӗрлӗ вӑйӑ, спорт ӑмӑртӑвӗсем иртрӗҫ. Ашшӗ-амӑшӗ лекцисемпе ҫавра сӗтелсене хутшӑнса пӗлӗвне пуянлатрӗ. Вӗренӳ учрежденийӗсем йӗркеленӗ ӑсталӑх сехечӗсем те пуриншӗн те кӑсӑк пулчӗҫ.
"Туриада" - Вӗренӳ министерствин пуҫарӑвӗпе иртекен фестиваль. Унта хутшӑнакансемпе Чӑваш Ен Пуҫлӑхӗ Олег Николаев тӗл пулма кӑмӑл турӗ. Ачасене воспитани парас ыйтусене шкулсенчи ашшӗ-амӑш комитечӗн хастарӗсемпе, вӗрентекенсемпе сӳтсе яврӗ. Раҫҫей конкурсӗнче ҫӗнтернӗ проектсемпе те паллашрӗҫ пухӑннисем. Ашшӗ-амӑшӗн пуҫарӑвне пурнӑҫа кӗртме пулӑшакан тупӑшу кӑҫал иккӗмӗш хут иртнӗ. Чӑваш Енрен унта 321 проект тӑратнӑ, 26-шӗ - ҫӗнтернӗ.
Грант илекенсен йышӗ ҫитес ҫул тата пысӑкрах пулас шанӑҫ пур. Фестивальте экспертсем конкурс валли проектсем хатӗрлеме вӗрентрӗҫ. Ҫемьесене пӗрлештерекен уявра кашниех хӑйӗншӗн усӑлли, ҫӗнни чылай пӗлчӗ.
Екатерина Фомина, Юрий Марков
