Алексей Лаврентьев ертсе пыракан ушкӑн Атӑлҫи чемпионачӗн Кубокне ҫӗнсе илес тӗллевлӗ пулнине турнир тӑршшӗпех ҫирӗплетсе пынӑ. Унчченхи икӗ сезонта икӗ хут 4-мӗш вырӑнпа ҫырлахнӑскерсем, кӑҫалхи 12 тӗлпулуран пӗринче кӑна выляса янӑ. Чӑваш Енри команди финалти вӑйӑсенче те Пензӑри "Росток", Хусанти "Фикс" тата Самарти "Динамо" ушкӑнсене парӑнтарса Атӑл тӑрӑхӗнчи чемпионсен Кубокне ҫӗнсе илчӗ.
Хӗрарӑмсен "Спартак Чувашия" волейбол команди вара финалти вӑйӑсене килте, Чӑваш патшалӑх аграри университечӗн спорт комплексӗнче ирттерчӗ. Светлана Ивановпа Эдуард Григорьев тренерсен вӗренекенӗсем хӑйсен умне лартнӑ тӗллевсене туллин пурнӑҫларӗҫ. Пӗлтӗрхи сезонта кӗмӗл медаль ҫӗнсе илнӗскерсем, Перьмри "Академие" 3:1 тата Кироври "Динамона" 3:0 шутпа ҫӗнтерчӗҫ, тӗп парнене тивӗҫрӗҫ. Апла пулин те Раҫҫей чемпионачӗн пӗрремӗш лигин суперфиналне, вӑл ака уйӑхӗн 10-мӗшӗнче пуҫланать, чӑваш хӗрӗсен команди хутшӑнмӗ.
Надежда Александрова, Вячеслав Ильин, Святослав Петров
