8-мӗш ҫул ӗнтӗ Шупашкарта тӗрлӗ регионти актёрсем пуҫтарӑнаҫҫӗ. Кӑҫал Пушкӑрт, Мари Республикисенчен тата Чулхуларан пултарулӑх ушкӑнӗсем килсе ҫитнӗ. Пӗтӗм спектакль ачасемпе ҫамрӑксем валли. Вӗсем ҫемье, ашшӗ-амӑшӗпе ачасен хутшӑнӑвӗ тата ҫут ҫанталӑка упрасси пирки. Фестиваль Иосиф Дмитриев-Трер ячӗпе хисепленсе тӑрать.
Кашни спектакле хыҫҫӑн тӳресем сӳтсе яваҫҫӗ. Актерсем вылянине, режиссер тата пӗтӗмӗшле пултарулӑх ушкӑнӗн ӗҫне хак параҫҫӗ. Вӗсен йышӗнче театр педагогӗ, пӗтӗм тӗнчери тата Раҫҫейри фестивальсен эксперчӗ Виктор Шрайман. Пӗрремӗшӗ хӑйсен постановкипе Чулхулари ҫамрӑксен театрӗ паллаштарчӗ. Вӗсем Ганс Христиан Андерсен хайлаве тӑрӑх лартнӑ "Огниво" юрӑллӑ-ташӑллӑ юмах илсе килнӗ. Кӑсӑклӑ диалогсем, хӑвӑрт аталанса пыракан сюжет тата асамлӑх. Ҫакӑ пӗтӗмпех куракансене тыткӑнларӗ.
Фестиваль чӳк уйӑхӗн 23-мӗшчен пырать. Паян Ӗпхӳри ҫамрӑксен театрӗ, ыран мари артисчӗсем спектакльсем кӑтартаҫҫӗ. Юлашки кунне вара куракансем Чӑваш патшалӑх ҫамрӑксен театрӗн "Суперзаяц и браконьеры" кӑҫалхи ҫӗнӗ ӗҫӗпе паллашма пултараҫҫӗ.
Надежда Александрова, Михаил Солин
