Ут кӳлсе ӑмӑртакансене хавхалантарма ипподрома 15 пин ытла куракан пухӑнчӗ, тепӗр 6 пин ҫын тупӑшу епле иртнине он-лайн сӑнарӗ. Пӗтӗмӗшле парне фончӗ - 2 миллион тенкӗ. Ӑна пилӗк номинацире валеҫрӗҫ. Елчӗк тӑрӑхӗнчен ҫитнӗ 67 ҫулти Валерий Филимонов ҫакнашкал пысӑк ӑмӑртӑва Лагерта урхамахӗпе пуҫласа хутшӑнать.
Лагертӑна Валерий Филимонов Чӗмпӗр тӑрӑхӗнчен кӳрсе килнӗ. Вӑл чаплӑ йӑхран пулнине шута илсе ӑмӑртусене хутшӑнса пӑхас тенӗ. Тренировкӑсем ирттерме тытӑннӑ. Лагерта хуҫипе Ҫӗнӗ Шупашкар хулин пуҫлӑхӗн парнине ҫӗнсе илессишӗн тупӑшрӗ, финиша вӑл тӑваттӑмӗш ҫитрӗ. Ҫӗнтерӳҫӗ ята вара Тутарстанран килнӗ Диля Галимзянова Восход Лок ӑйӑрӗпе тивӗҫрӗ. Унӑн ентешӗ Эдуард Большаков та пӗрремӗш пулчӗ. Гиф Мар урхамахӗпе вӑл Спорт министерствин, "Байрам ЕН" лашипе Ял хуҫалӑх министерствин Кубокӗсене ҫӗнсе илчӗ. Спорт уявӗн тӗп парнишӗн, пӗр миллион тенкӗшӗн, тупӑшу уйрӑмах хӗрӳ иртрӗ. Старта иртнӗ ҫулхи ҫӗнтерӳҫӗ - Валерий Краснов "Зов предков" лашипе тухрӗ. Кӑҫал та вӗсен Республика Пуҫлӑхӗн Кубокне илес шанӑҫ пысӑкчӗ. Анчах финишра "Зов предков" "Ворчун" ӑйӑра иккӗ ҫӗрмӗш ҫеккунт мала ирттерчӗ. Тӗп парнене Леонид Кошкинпа Олег Хлюкин Шӑмӑршӑ тӑрӑхне илсе кайрӗҫ.
"Зов предков" вара Етӗрнери лаша завочӗн ипподромӗнче ҫӗнтерӳ паллӑ тӑвасса шанать. Унта йӑлана кӗнӗ ӑмӑрту ҫурла уйӑхӗн 10-мӗшӗнче иртӗ.
Екатерина Фомина, Вячеслав Ильин, Игорь Ульянов
