Ӑмӑртӑва пурӗ ҫӗршыври 14 регионтан 500 яхӑн каратист хутшӑнчӗ. Вӗсем хӑйсен вӑйне 9 ушкӑнра виҫрӗҫ. Малтанах медальсене чи кӗҫӗннисем хушшинче выляттарчӗҫ. Мала тухнисен йышӗнче пирӗн республикӑри Мирославапа Милена Николаевасем пулчӗҫ. Вӗсем иккӗшӗ 3 ылтӑн тата 4 кӗмӗл медаль ҫӗнсе илчӗҫ. Палӑртмалла, хӗрачасене ашшӗ Руслан Николаев вӗрентет. Чӑваш Енӗн пӗрлештернӗ ушкӑнӗнчи ытти спортсменсем те палӑрчӗҫ. Азандей Тимофеев кӗмӗл, Алексей Ландышев бронза медальсене тивӗҫрӗҫ. Ҫавӑн пекех хӑйсен ушкӑнӗсенче Александр Белоцкий, Иван Фомин, Иван Белов ҫӗнтеруҫӗ пулчӗҫ. Ҫапла пирӗн республика команди ушкӑнпа 1-мӗш вырӑна, 2-мӗшне - Саратов облаҫӗн, виҫҫӗмӗшне Чулхула спортсменӗсем тухрӗҫ.
Диана Иванова, Вячеслав Ильин
