Ӑмӑртру Олимп резервӗн 7-мӗш спорт шкулӗнче иртрӗ. Унта 4 ҫултан пуҫласа 13 ҫулчченхи каратистсем вӑй виҫрӗҫ. Ку турнир вӑл - ҫӗртме уйӑхӗнче карате енӗпе пулакан Пӗтӗм ҫӗршыври чемпионатпа первенствине хатӗрленни.
Спортсменсем 5 усӗмри ушкӑнра тупӑшрӗҫ. Ӑмӑртура арҫын ачасемпе танах хӗр ачасем те хастарлӑхпа палӑрчӗҫ. Ҫӗнӗ Шупашкарти 1-мӗш шкулта вӗренекен Миленапа Мирослава Николаевасем тата Марина Рогожина "годзю сихо шо" дисциплинӑра вӑйне тӗрӗслерӗҫ. 10-11 ҫултисен ушкӑнӗнче 2-мӗш вырӑн йышӑнчӗҫ. Вӗсен тренерӗ - Руслан Николаев.
Виҫҫӗмӗш вырӑна Канашри ушкӑн тивӗҫрӗ. Ун йышӗнче Дмитрий Байдулов, Антон Михайлов тата Екатерина Владимирова. Вӗсенчен чи опытли Антон Михайлов. Вӑл Александр Антонов тренер патӗнче ӑсталӑхне 6-мӗш ҫул туптать.
Пӗрремӗш вырӑна вара Чӑваш Енӗн пӗрлештернӗ ушкӑнӗнчи арҫын ачасем йышӑнчӗҫ. Хӗр ачасем те ылтӑн медальсӗр юлмарӗҫ. Мирослава Николаева уйрӑм тупӑшура "ката" тата "кумитэ" дисциплинӑсенче ҫӗнтерсе икӗ хутчен пъедестал ҫине хӑпарчӗ. Унӑн йӑмӑкӗ Милена 8-9 ҫулти хӗр ачасем хушшинче чи лайӑххи пулчӗ.
Диана Иванова, Вячеслав Ильин
