36 урхамах - 4 ҫултан аслăраххисем, вун виççĕшĕ - 3 ҫулхисем. Вĕсене валли 4 парне хатĕрленĕ. Çурма финалта чи лайăх вăхăт кăтартнă пĕрремĕш 8 лаша Республика Пуçлăхĕн Кубокне çĕнсе илессишĕн тупăшĕ. 9-мĕш вырăнтан пуçласа 16-мĕшне çити йышăннисен ЧР ял хуçалăх министерствин парнине тивĕçес шанăç пур. Тата тепĕр 8 лаша спорт министерствин парнишĕн старта тухĕ. Ҫӗнӗ Шупашкар пуҫлӑхӗ те чи йăрă урхамаха чыслĕ. Унăн парнишĕн виçĕ çулхи утсем тупăшĕç. Ку ушкăнра тилхепе тытса пыракансен йышĕнче хĕрарăмсем те пур - Марина Воробьёвапа Марина Никольская. Чăваш Ен Пуҫлӑхӗн Кубокӗшӗн ăмăрту хĕрÿ иртесси куçкĕрет. Пĕрремĕш çурма финалта старта хальччен ят-сум çĕнсе илнĕ урхамахсем тухĕҫ - Зов Предков РМ, Патӑрьелти "Акатуй-Сабантуй уявӗнче ҫӗнтернĕ Ворчун, "Тутарстан Мăнаçлăхĕ" ята тивĕçнĕ Багир Блю ӑйӑр. Ытти лашасен те кăтартăвĕсем лайăх – пин те 600 метра вĕсем 2 минутран та сахалрах вӑхӑтра чупса тухаяҫҫӗ. Чи пысăк хăвăртлăх Патăрьел тăрăхĕнчи Анатолий Каргинăн Визбург ЛОК лаши кăтартнă - 1 минут та 56,2 ҫеккунт. Шӑпа янă тăрăх вӑл 4-мӗш чупура старта тухать. Пурĕ 5 çурма финал пулĕ.
Надежда Александрова, Вячеслав Ильин, Михаил Солин
