Спортпа туслӑ тӗрлӗ ӳсӗмри ҫынсем пирӗн региона 39-мӗш хут килнӗ. Мускав, Питӗр, Владимир хулисенче чи вӑйлӑ шутланакан атлетсем, Киров, Оренбург облаҫӗсенчен, Пушкӑрт, Тутар Республикисенчен ҫитнисем ҫӗнтерес тӗллевпе тупӑшрӗҫ. Вӗсен хушшинче Чӑваш Енри ӑмӑртӑва ҫулсеренех хутшӑнаканнисем те, хӑйсен вӑйне пӗрремӗш хут тӗрӗслекенсем те пулчӗҫ. Пурпӗр кашнин тӗллевӗ - ҫулран-ҫул ӑсталӑхне ӳстерсе пысӑкрах ҫитӗнӳсем тӑвасси.
Ҫитӗнекен ӑрӑва малалла талпӑнма кире пуканӗ йӑтса палӑрнӑ ентешӗсен тӗслӗхӗ те хистет. Елчӗк тӑрӑхӗнче ҫуралса ӳснӗ Николай Петров, сӑмахран, хӑй вӑхӑтӗнче "Хыпар" хаҫат ирттерекен ӑмӑртура ӑсталӑхне туптанӑ. Вилнӗ хыҫҫӑн Раҫҫей Геройӗ ятпа чысланӑ салтака турнира уҫиччен шӑп тӑрса асӑнчӗҫ.
Хӑйсен виҫе ушкӑнӗсенче мала тухнисене йӑлана кӗнӗ тӑрӑх паха парнесемпе чысларӗҫ. Кире пуканӗ йӑтакансене шӑпах ҫак ӑмӑртӑва лекме хавхалантараканни татах та пур.
2 куна пынӑ турнир пӗтӗмлетӗвӗ тӑрӑх, Киров облаҫӗн пӗрлештернӗ ушкӑнӗ ҫӗнтерчӗ. 2-мӗш вырӑнта - Чӑваш республики, 3-мӗш - Тутарстсан.
Алиса Александрова, Андрей Шоклев
