Сергей Афанасьев Анаткас ялӗнче ҫуралса ӳснӗ. Ҫӑмӑл атлетикӑпа вӑл Мӑн Шетмӗ шкулӗнчи спорт секцине ҫӳреме пуҫласан кӑсӑкланса кайнӑ. Кайран ку енӗпе пысӑк ҫитӗнӳсем тума пултарнӑ. Спорт карьерине вӗҫленӗ хыҫҫӑн тренерта тӑрӑшнӑ, хӑй ҫуралса ӳснӗ тӑрӑхра ӑмӑртусем йӗркелеме пуҫланӑ. 2019-мӗш ҫултан вара Сергей Германович ячӗпе чупу ирттерме тытӑннӑ.
Спорт уявне Сергей Афанасьевӑн мӑшарӗ, Раҫҫей тава тивӗҫлӗ спорт мастерӗ Елена Афанасьева, хӗрӗ тата 7 ҫулти Александра мӑнукӗ те килсе ҫитнӗ. Александра, паллах, ку чупӑва кукашшӗне халалларӗ. Вӑл та дистанцие парӑнтарчӗ, чи ҫамрӑк хутшӑнакан пулчӗ. Ку тӑрӑхра ҫуралса ӳснӗ ытти паллӑ спортсменсем те ентешне сума-суса старта тухрӗҫ.
Спорт уявӗ эстафетӑпа вӗҫленчӗ. Ку ӑмӑртура Красноармейски тӑрӑхӗнчи Яманак шкулӗн ушкӑнне ҫитекенни пулмарӗ. Мала тухакансене медальсемпе кубоксем, хаклӑ парнесем парса хавхалантарчӗҫ. Пухӑннисем ҫавӑн пекех ялти чиркӳ картишӗнче Сергей Афанасьева ӑсӑнса 10 туя йывӑҫҫи лартрӗҫ.
Оксана Верликова, Вячеслав Ильин
