Пирӗн мухтавлӑ ентешӗмӗрӗн, Раҫҫей Геройӗн, Николай Гаврилов генерал-лейтенантӑн парнисене тивӗҫессишӗн ирттерекен йӑлана кӗнӗ турнир ҫӗршыври чи вӑйлӑ кӗрешӳҫӗсене пуҫтарма пултарни хӑйех ӑмӑртӑвӑн шайне ҫӳле ҫӗклерӗ. Турнирта мала тухни Раҫҫей спорт маҫтӑрӗн ятне илме май пани те чи паллӑ спортсменсене ӑмӑртӑва хутшӑнма илӗртет.
Турнир "Волга" сывлӑха ҫирӗплетмелли физкультура центрӗнче иртрӗ. Пирӗн Героя республикӑра спорт аван аталанса пыни, ҫакӑн йышши ҫӗнӗ стадионсем ҫӗкленни савӑнтарать. Сывлӑха куллен ҫирӗплетессине патриотла воспитанипе пӗрле шкул ачисен ӑс-тӑнне хывассине мала хурать вӑл, хӑй те мӗн пӗчӗкрен ҫапла ӳснӗ.
Ӑмӑртура кӗрешӳҫӗсем виҫине кура 10 ушкӑна пайланса вӑй виҫрӗҫ. Чӑваш патшалӑх аграри университетӗнчен 8 спортсмен килнӗ.
Иккӗмӗш кун кавир ҫине пирӗн Егор Смирнов тухрӗ. 57 килоллисем хушшинче вӑл Тутарстанран килнӗ Тельман Оруджова мала ирттерсе кӗмӗл ҫӗнсе илчӗ. Канашран килнӗ Арсений Сергеев вара финалти тытӑҫура 97 килоллисем хушшинче Тутарстанри Камиль Ахметзяутдинова ҫӑмӑллӑнах ҫӗнтерчӗ. Ҫакӑ ытти чӑваш спортсменӗсене те хӑпартлантарса ячӗ. 61 килограмлисен йышӗнче Кирилл Бахметьев, 92 килограмлисем хушшинче Евгений Павлов пӗрремӗш вырӑна тивӗҫрӗҫ.
Марина Карягина, Леонид Петров, Виктор Степанов
