Ку спорт уявӗ Муркаш тӑрӑхӗнче ҫулсерен вӑй илсе пырать. Иртнӗ ҫулсенче тупӑшӑва 3-4 команда кӑна хутшӑннӑ пулсан, ку хутӗнче 6 ушкӑн хӑйсен вӑйне тӗрӗслеме кӑмӑл тунӑ. Спорт ветеранӗсем ялсенчен те пуҫтарӑннӑ. Чи ҫамрӑкки 61 ҫулта, чи асли вара - 77-ре.
Вӑйӑсем хӗрӳ иртрӗҫ. Тупӑшӑва хутшӑнакансем хӑйсен чун ҫирӗплӗхӗпе ҫаврӑнӑҫулӑхне, туслӑхра пӗр-пӗрне ялан пулӑшма хатӗррине кӑтартса пачӗҫ. Аслӑ ҫулти волейболистсенчен ҫамрӑксен вӗренмелли кӑна юлать, тесен те йӑнӑш пулмӗ.
Турнир пӗтӗмлетӗвӗ тӑрӑх виҫҫӗмӗш вырӑна Оринин ял тӑрӑхӗн спортсменӗсем йышӑнчӗҫ. Иккӗмӗшсем - ҫатракассисем. Пъедесталӑн чи ҫӳлти картлашки ҫине вара Уйкас-Янасал ялӗн команди хӑпарчӗ. Сывӑ пурнӑҫ йӗркине кӑмӑллакансене дипломсемпе тав хучӗсем парса чысларӗҫ.
Леонид Петров, Иван Макеев
