Патӑрьелсем мухтавлӑ ентешӗсене халалласа кашни ҫулах 40 ытла спорт ӑмӑртӑвӗ йӗркелеҫҫӗ. Федор Моисеев ячӗллӗ турнир вара чи сумлисенчен пӗри. Кӑҫалхипе вӑл кире пуканӗ йӑтакансене Патӑрьел ҫӗрӗ ҫинче 29-мӗш хут пухрӗ. Тупӑшу пуҫланиччен тӗрлӗ тӑрӑхран килнӗ хӑнасем спортсменсене ӑнӑҫу сунса мухтавлӑ ентешне аса илчӗҫ.
Федор Моисеев Чӑваш Енри ӑмӑртусен ҫеҫ мар, ҫӗршыв шайӗнчи турнирсен ҫӗнтерӳҫи пулнӑ. Республикӑра ҫине-ҫине рекордсем ҫапнӑ. Пурнӑҫра вара чӑн-чӑн пултаруллӑ ертӳҫӗ пулнӑ. Ӑнӑҫлӑ спортсмен ячӗпе ялта урам та хисепленет.
Ӑмӑртура 3 регионти 80 ытла атлет хутшӑнчӗ. Пурӗ 14 ушкӑн. Ветерансен йышӗнче кӑна кире пуканӗ йӑтассинче "Тӗнче чемпионӗ" ята тивӗҫнӗ 6 спортсмен пулчӗ. Вӗсене курса ҫамрӑксем хӑйсен ӑсталӑхне туптаҫҫӗ. Ҫак ҫитӗнӳсем вара патӑрьелсене спорт аталанӑвне пысӑк тимлӗх уйӑрма хистеҫҫӗ.
Алексей Енейкн, Иван Макеев
