Йӗпреҫри культура керменне хастарсем ӗҫе ҫӳренӗ пек ҫӳреҫҫӗ. Кунта хӳтлӗх карри ҫыхмалли пункта ҫулталӑк каялла йӗркеленӗ. Унтанпа туслӑ ушкӑн чӑмӑртанма ӗлкӗрнӗ. "Кӗмӗл" волонтерсемпе тан ҫамрӑксем те май килнӗ таран тӑрӑшаҫҫӗ. Кӑмӑлӗсене юрӑ шӑрантарса ҫӗклеҫҫӗ. "Пирӗн пуҫ усма юрмасть, ентешсене чӗрӗ-сывӑ таврӑнма пулӑшмалла", - теҫҫӗ. Ҫак тӗллевпе 65 ҫулти Роза Хлебникова "За Отечество" центр йӗркеленӗ те. Пӗр шухӑшлӑ ҫынсем часах тупӑннӑ.
Йӗпреҫри Центр пулӑшнипе кашни ял тӑрӑхӗнче тенӗ пекех маскировка сеткисем ҫыхмалли пункт йӗркеленӗ. Паянхи кун кӑмӑл тӑвакансене 16 вырӑнта кӗтеҫҫӗ. Хастарсем тӑрӑшнипе фронта пин те икҫӗр ытла хӳтлӗх хатӗрӗ ӑсатнӑ.
Пурнӑҫа ҫӑлса хӑварма пултаракан ҫи-пуҫ та ҫӗлеҫҫӗ. Ку енӗпе уйрӑмах Ҫирӗклӗ ял халӑхӗ хастар. Сакӑр уйӑхра вӗсем ҫӗр ытла хӳтӗлев пӗркенчӗкӗ ӑсталанӑ. Эйпеҫсем кӑна мар, туҫасем те юлас темен. Вӗсем те ятарлӑ ҫи-пуҫ хатӗрлессипе малтисен йышӗнче.
Шӑрттан ялӗнче пурӑнакан Вера Прокопьева вара хӑй пӗччен шлем ҫине тӑхӑнтартмалли 150 яхӑн ятарлӑ хатӗр ӑсталанӑ.
Материалпа ялти пунктсене Йӗпреҫри центр тивӗҫтерет. Укҫа-тенкӗпе ахаль ҫынсем пулӑшаҫҫӗ. Ҫакӑншӑн уйрӑмах вӗсене тав тӑвас килет, тет Роза Хлебникова. Нумаях пулмасть хастарсем дронран хӳтӗленмелли плащ та ҫӗлесе пӑхнӑ. Ӑна фронтра ырласса ӗненеҫҫӗ. Йӗпреҫсем ӗҫе тӗплӗ тума тӑрӑшаҫҫӗ. Хатӗр маскировка каррине Роза Хлебникова телефон камерипе тӗрӗслет. Куҫ курманнине техника асӑрхать, тет. Салтаксен пурнӑҫӗ ҫӑмӑл маррине ӑнланса гуманитари пулӑшӑвӗ те пуҫтараҫҫӗ. Мӗн кирлине кашни уйӑхра ӑсатаҫҫӗ.
Ентешсемпе яланах ҫыхӑнура. Вӗсем тӗрлӗ подразделенире пулин те, пулӑшусӑр никама та хӑвармаҫҫӗ. Вырӑнти усламҫӑсем те май килнӗ таран тӗрев параҫҫӗ. Тимӗр кӑмакасем хатӗрлеҫҫӗ. Вӗсем Йӗпреҫ тӑрӑхӗнчен пулни тӳрех паллӑ.
Салтаксем те кашни килмессерен хастарсем патне кӗрсе тухма тӑрӑшаҫҫӗ. Хисеп хучӗсемпе медальсем - пурте вӗсенчен. Акӑ - черетлӗ награда.
"Эпир ырӑ сӑмахшӑн ӗҫлеместпӗр, пирӗншӗн чи кирли - салтаксен пурнӑҫне сыхласа хӑварасси", - теҫҫӗ йӗпреҫсем. Мирлӗ пурнӑҫ ҫитессе те ӗненеҫҫӗ. Чӑмӑртаннӑ ушкӑн вӑйне ӑҫта ярасси пирки те шутлаҫҫӗ. Хальлӗхе вара фронта май килнӗ таран пулӑшаҫҫӗ.
Вероника Павлова, Виктор Степанов
