Кӗтеснер шкулӗнче паттӑрсен ячӗсене асра тытаҫҫӗ. Пӗлу ҫуртӗнчи музейра ятарлӑ ҫар операцинче пуҫ хунисене халалласа уйрӑм стенд йӗркеленӗ. Александр Николаев та вӗренекенсемшӗн чӑн патриот тӗслӗхӗ. Вӑрмарсем унпа тивӗҫлипех мӑнаҫланаҫҫӗ.
Саша Николаев тӑрӑшуллӑ, сӑпайлӑ, пурнӑҫа юратакан ача пулнӑ. Кӗтеснерти тӗп шкултан вӑл хӗрлӗ аттестатпа вӗренсе тухнӑ. Аслӑ классене Вӑрмар шкулне ҫӳренӗ. Пур ӗҫре те хастарлӑхпа палӑрнӑ каччӑ. Спорт ӑмӑртӑвӗсенче, наукӑпа практика конференцийӗсенче пӗрре мар малти вырӑнсене йышӑннӑ. Мӗн ачаранах хирург пулма ӗмӗтленнӗ. Аслӑ классенче вара пурнӑҫне ҫар ӗҫӗпе ҫыхӑнтарма тӗллев лартнӑ. 2017-мӗш ҫулта Пермьри ҫар институтне вӗренме кӗнӗ, ӑнӑҫлӑ вӗҫленӗ. Чи лайӑххисен ретӗнче пулнипе ҫамрӑк офицер Раҫҫей хӑрушсӑрлӑх службин тытӑмне лекнӗ. Ҫар тивӗҫне аслӑ лейтенант Ленинград облаҫӗнче пурнӑҫланӑ. "Пӗрремӗш кунрах хӑйне ырӑ енчен кӑна кӑтартрӗ, тивӗҫе тӳрӗ кӑмӑлпа пурнӑҫларӗ", - терӗ Питӗрпе Ленинград облаҫӗнчи пограничниксен управленийӗн Выборг хулинчи служба ӗҫченӗ Виталий Рупышев митингра. Ытти тухса калаҫакансем те Александр Николаев ентешсен асӗнче яланлӑха паттӑр пулса юлнине палӑртрӗҫ.
Асӑну хӑмине Александр Николаевӑн ашшӗпе амӑшӗ, пиччӗшӗ тата хресна ывӑлӗ уҫрӗҫ. Пухӑннисем чӗрӗ чечексем хучӗҫ. Аслӑ лейтенант Брянск тӑрӑхӗнче националистсене хирӗҫ пынӑ тан мар ҫапӑҫура паттӑррӑн пуҫ хунӑ. Юлташӗсене хӳтӗлесе вилмеллех аманнӑ. Вӑрмар каччине "Паттӑрлӑх" орденӗпе наградӑланӑ. Уҫӑ чунлӑ, шанчӑклӑ, йывӑр вӑхӑтра ялан пулӑшма хатӗр пулнӑ вӑл. Ҫапла аса илеҫҫӗ Сашӑна юлташӗсемпе тӑванӗсем.
Ҫывӑх ҫынсен чӗринчи ыратӑва, паллах, нимӗнле сӑмахпа та лӑплантараймӑн. Ҫапах та Александр Николаев урӑхла пултарайман - вӑл ҫӗршыв хӳтӗлевҫин чысне ялан малти вырӑна хунӑ. Ҫавӑнпа унӑн ячӗ ӗмӗр асра юлӗ.
Диана Иванова, Екатерина Янгалакова
