Ку вӑл тӗллевӗ патне ҫирӗппӗн утса хӑйсен ӗҫне пуҫласа яма пултарнӑ, ӑнӑҫлӑ йӗркелесе пыракан пуҫаруллӑ ҫынсен уявӗ. Экономикӑра хӑйсен вырӑнне йышӑнасси, ҫӗнӗ шухӑшсемпе проектсене пурнӑҫа кӗртесси - хисепе тивӗҫ ҫав тери пысӑк ӗҫ. Пухӑннисене уявпа видеоҫыхӑну урлӑ Республика Пуҫлӑхӗ Олег Николаев саламларӗ. Кӑҫал пӗчӗк тата вӑтам бизнес йӗркеленисем тата хӑйсем тӗллӗн ӗҫлекенсем "Мой бизнес" центрта тӳлевсӗр консультаци илме тата вӗренме пултараҫҫӗ. Паянхи кун республикӑра 30 пин ытла харпӑр хӑй предприниматель ӗҫлет. Ҫуррине яхӑн - Чӑваш Енӗн тӗп хулинче. Уявра Экономика министерстви пуҫарнӑ "Чи лайӑх предприниматель" конкурс ҫӗнтерӳҫисене тӗрлӗ номинацире чысларӗҫ.
Алиса Александрова, Дмитрий Макаров
