Чӑн та, конкурс Чӑваш Енри кирпӗч хуракан чи ӑста маҫтӑрсене пуҫтарнӑ. Кашниех хӑйӗн ӗҫне тирпейлӗ те тӗплӗ тӑвать. Профессине юратма сӑлтавӗ чылай, теҫҫӗ строительсем.
Кӑҫал тупӑшӑва республикӑри строительство пӗрлешӗвӗсен 7 ушкӑнӗ хутшӑннӑ. Кашни звенора - 2 ҫын. Пӗртӑван Васильевсем пӗрле ӗҫлеҫҫӗ. Темиҫе ҫул каялла вӗсем хӑйсен вӑйне тӗрӗслесе пӑхнӑ, 1-мӗш вырӑн йышӑннӑ. Кӑҫал та малтисен ретӗнче пуласшӑн.
Конкурса хутшӑниччен чылайӑшӗ тӑван пӗрлешӳре тӗрлӗ тӗрӗслев витӗр тухнӑ. Кунта пуринпе тан тупӑшни те паха. Сӑмах май, кирпӗч хуракансен ӑсталӑх конкурсне Чӑваш Енре 20 ҫул ытла йӗркелеҫҫӗ. Тӗп тӗллевӗ - рабочи специальноҫӗн сумне ӳстересси.
Тупӑшу "3-мӗш Стройтрест" пӗрлешӳ хӑпартакан ҫуртра иртрӗ. Ку компани пӗрремӗш ҫул мар конкурса йӗркелеме пулӑшать. Пӗлтӗр кирпӗч хуракан ӑстасем юнашар ҫурта купаланӑ. Ҫӳлтен хулан илемлӗ вырӑнӗсем ал тупанӗ ҫинчи пек курӑнаҫҫӗ - Владимир тӑвӗ, Кӳлемӗш - ҫакӑ та рабочисене хавхалантарчӗ. Тӳресем ӗҫ калӑпӑшне, унӑн пахалӑхне хакларӗҫ, ӗҫ хӑрушсӑрлӑхне пӑхӑннине те шута илчӗҫ. Чи лайӑххисене хаклӑ парнесем тата укҫа парса чысларӗҫ. Сӑмай май, пӗр тӑван Васильевсем 3-мӗш вырӑна тивӗҫ пулчӗҫ. Иккӗмӗшсем - Александр Игнатьевпа Алексей Каримкин. Конкурс пӗтӗмлетӗвӗпе чи лайӑх кирпӗч хуракансем "3-мӗш Стройтрестра" ӗҫлеҫҫӗ - Евгений Воробьевпа Алексей Петрянкин.
Вероника Павлова, Виктор Степанов
