Кӑҫал Шупашкар округ администрацийӗн умӗнчи паркӑн сӑн-сӑпачӗ улшӑнӗ. Ҫак тӗллевпе федераци хыснинчен 10 миллион тенкӗ уйӑрнӑ. Малашне кунта уҫӑлса ҫӳреме кӑна мар, ӑс-тӑн ҫивӗчлӗхне аталантарма та пулӗ. Строительсем шахмӑтла вылямалли сӗтелсем вырнаҫтарнӑ. Тепӗр ҫӗнӗлӗх - хӑйнеевӗрлӗ тротуарсем. - Кун пеккине Чӑваш Енре хальлӗхе курман, - тет подрядчик. Улшӑнусене Кӳкеҫре пурӑнакансем ҫурла уйӑхӗн вӗҫӗнче хаклама пултарӗҫ. Явӑш ялӗнчи ача-пӑча лаптӑкне тирпейлеме те федераци бюджетӗнчен укҫа уйӑрнӑ. Асӑннӑ проектсене ҫынсен хастарлӑхне пула пурнӑҫа кӗртеҫҫӗ. Ҫӗнӗ парксемпе скверсемшӗн халӑх кашни ҫулах сасӑлать.
Ҫӗньялти ырӑ улшӑнусемшӗн 12 пин ытла ҫын сасӑланӑ. Ҫитес ҫул кунта ача-пӑча тата спорт лаптӑкӗсем тумалла.
Кӳкеҫри Асӑну скверне вара пӗлтӗрех тирпей-илем кӗртнӗ. Хальхи йышши ҫутӑ хатӗрӗсем, саксем тата хӗйнеевӗрлӗ кӳлепесем вырнаҫтарнӑ. Пурӗ 17 миллион тенкӗ тӑккаланӑ. Муниципалитет хыснинчен ҫавӑн чухлӗ укҫа уйӑрма йывӑр пулӗччӗ. Ҫавӑнпа та федераци программин усси куҫкӗрет.
Ял-хуласене хӑтлӑх кӳмелли программӑпа килӗшӳллӗн обществӑлла лапамсене тирпейлеме укҫа-тенкӗ федераци хыснинчен уйӑраҫҫӗ, кил-ҫурт ҫумӗнчи лаптӑксемшӗн вара регионсем яваплӑ. Кӳкеҫри Совет урамӗнчи 80-мӗш ҫурт ҫывӑхӗнче строительсем асфальт улӑштарнӑ тата ҫутӑ хунарӗсем вырнаҫтарнӑ. Ку таранччен кунта тӗттӗм пулнӑ. Ырӑ улшӑнусем Кӳкеҫре ҫеҫ мар, Ҫырмапуҫ, Тутаркасси, Ишлей территори уйрӑмӗсене те кӗтеҫҫӗ. Кӑҫал Шупашкар тӑрӑхӗнчи ҫурт картишӗсене тирейлеме 35 миллион тенкӗ уйӑрнӑ.
Вероника Павлова, Святослав Петров
