Ҫӑлтӑрпа иртекен савӑнӑҫлӑ зарядка ир-ирех Хӗрлӗ тӳремре халӑх пухса юбилейлӑ уяв кунне уҫрӗ. 555 ҫулти Шупашкар мӗнпур халӑха Чӑваш Ен спортпа туслӑ регион пулнине ҫирӗплетрӗ.
Зарядкӑна пухӑннисене Патшалӑх Канашӗн ертӳҫи Леонид Черкесов, хула пуҫлӑхӗ Владимир Доброхотов тата депутатсен Пухӑвӗн ертӳҫи Евгений Кадышев саламларӗҫ. Сывлӑха ҫирӗплетекен хӑнӑхтарусене вара паллӑ спортсменсем ирттерчӗҫ: Алексей Германов, Владислав Поляшов, Иван Соловьев, Александр Федоров тата Оксана Вербина сцена ҫинче хӗм кӑларса халӑх кӑмӑлне ҫӗклерӗҫ. Хулан мухтавлӑ баскетбол ушкӑнӗ те уяв халӑхне тӗрлӗрен хусканусем вӗрентсе савӑнтарчӗ. Спортсменсен йышне Ҫӗнӗ Шупашкарта ҫуралса ӳснӗ Анатолий Гущин актер та хутшӑнчӗ. Уяври пин-пин ҫын пӗр юхӑма тӑрса юрӑ-ташӑллӑ кӑтартусенче савӑнчӗ.
Хула кунне уявлассине зарядкӑран пуҫлас йӑлана 2011-мӗш ҫулта пуҫарса янӑ. 13-мӗш ҫулта вара Шупашкар сывлӑх уявне 28 пин ҫын пухса Раҫҫейпе Европӑн рекордсен кӗнекине кӗме пултарнӑ. Ҫак ҫитӗнӳ ырӑ йӑлана малалла тӑсса, вӑйлатса пыма хистет. Ҫулсерен ҫӑмӑл атлетика енӗпе ҫӗршыв чемпионатне йышӑнакан Шупашкара халӗ, чӑннипех те, сывӑ пурнӑҫ йӗркине кӑмӑллакансен хули теме пулать.
Тӗлӗнмелле кӑтарту Раҫҫей сывлӑш флочӗн кунӗпе пӗр килчӗ. Тимӗр кайӑксем сехетре 750 ҫухрӑм хӑвӑртлӑхпа вӗҫсе пӗчченшерӗн тата 6 истребительтен тӑракан ушкӑнпа этем вӑйӗ чикӗсӗр пулнине кӑтартрӗҫ.
Ҫӑмӑл вӗҫевлӗ "МиГ-29" истребительсем ӑста пилотсен аллинче асамлӑ кайӑк евӗр тӗм тӗрлӗ те ҫаврӑнса вӗҫме пултараҫҫӗ. "Вӗршӗнсен" ушкӑнӗ Атӑл ҫийӗн ярӑнса иртсе калама ҫук кӑткӑс хӑнӑхтарусемпе тӗрлӗрен кӳлепесем туса кӑтартрӗ. Сывлӑшра чечек ҫурӑлнӑ евӗр уҫӑлса хулана хӑйӗн ытамне илчӗ.
Легендарлӑ ушкӑн Шупашкарта 4-мӗш хут. Вӗсен ӑсталӑхӗпе мӑнаҫланса хулари садиксенчен пӗрне "Стрижи" ят панӑ. Пилотсем ачасемпе патриотла тӗлпулусем ирттерчӗҫ. Республика ҫыннисене тӗп хула ҫуралнӑ кунӗпе кӑмӑлтан саламларӗҫ.
Алексей Енейкин, Андрей Шоклев
