Чӑваш академи драма театрӗнче йӗркеленӗ уява пухӑннисем малтанах ӗҫ-хӗле пӗтӗмлетрӗҫ. Республикӑра "Вӑрмансене сыхласси" федераци проекчӗ ӑнӑҫлӑ пурнӑҫа кӗнине палӑртрӗҫ. Ахальтен мар Чӑваш Ен вӑрман хуҫалӑхне тухӑҫлӑ аталантаракан регионсен йышӗнче. Иртнӗ 5 ҫулта 6 пин ытла гектар ҫинче йывӑҫ лартнӑ. Ку тӗлӗшпе малалла та тӗллевлӗ ӗҫлӗҫ. Халӗ шӑпах вӑрман хуҫалӑхне аталантармалли тӗп документа хатӗрлеҫҫӗ. Унта, уйрӑммӑн илсен, вӑрлӑх туса илессине пысӑк тимлӗх уйӑрнӑ. Ҫак тӗллевпе Йӗпреҫ тӑрӑхӗнче ятарлӑ центр уҫма палӑртнӑ. Ҫавӑн пекех кадрсем хатӗрлес, вӑрмансенче экологипе ҫутӗҫ маршручӗсем йӗркелес ыйтусем пӗлтерӗшлӗ. Профессие ҫамрӑксене илӗртес тесе ачасемпе шкул саккинченех ӗҫлеме пуҫлаҫҫӗ. Вӑрмар тӑрӑхӗнче, тӗслӗхрен, 12 ҫул "Лесные Робинзоны" кружок ӗҫлет.
Пухӑннисене Республика Пуҫлӑхӗ Олег Николаев саламларӗ. Вӑрман хуҫалӑхӗнче нумай ҫул тӳрӗ кӑмӑлпа тӑрӑшакансене патшалӑх тата ведомство наградисем парса хавхалантарчӗ. Вӗсен йышӗнче ашшӗсен ӗҫне тӑсакансем те пулчӗҫ.
Паянхи куна республикӑри вӑрман хуҫалӑхне ятарлӑ техникӑпа 100 процент тивӗҫтернӗ. Ҫавӑн пекех кулленхи ӗҫре хальхи технологисене ытларах кӗртсе пыраҫҫӗ. Ҫакӑ вӑрманҫӑсене ҫӗнӗ тӗллевсем лартса вӗсене туллин пурнӑҫлама май парать.
Леонид Петров, Игорь Ульянов
