"В эфире - наследники Победы!" проекта виҫӗ ҫул каялла Шупашкарти клубсен пӗрлештернӗ тытӑмӗ пуҫарнӑ. Ун чухне конкурса Шупашкарти шкул ачисем ҫеҫ хутшӑнма пултарнӑ. Кӑҫал вара вӑл культура пуҫарӑвӗсен президент фончӗн грантне тивӗҫнӗ. Ҫавна май проекта тата ытларах ачана явӑҫтарма пултарнӑ. Конкурса Ҫӗрпӳ, Сӗнтӗрвӑрри, Ҫӗнӗ Шупашкарпа Шупашкар хулисенчи шкулсем тата Кӳкеҫри лицей хутшӑннӑ. Пурӗ 10 ушкӑнри 150 яхӑн вӗренекен мала тухассишӗн тупӑшнӑ.
Ачасен интернетри ушкӑнра патриотла темӑпа ҫыхӑннӑ тӗрлӗ ӗҫ тума тивнӗ. Хӗрсемпе каччӑсем ҫӗршыв, хӑйсен ҫемье историне тӗпченӗ, видео ӳкернӗ, сӑн ӳкерчӗксем тунӑ, сочиненисем ҫырнӑ, вӑйӑсене хутшӑннӑ тата ытти те. Вӗсем пурте Тӑван ҫӗршывӑн Аслӑ вӑрҫи пирки ытларах пӗлме пулӑшакан ӗҫсем. Проекта пӗтӗмлетсе ачасем видеожурнал хатӗрленӗ. Ӑна финалта кӑтартрӗҫ.
Ачасен ӗҫӗсене тӳресем пахаланӑ. Хӗрӳ тупӑшура Кӳкеҫри "Миротворец" ушкӑна ҫитекенсем пулмарӗҫ. Шупашкарти 39-мӗш шкулти "Патриоты 39" команда иккӗмӗш пулчӗ. Виҫҫӗмӗш вырӑна Сӗнтӗрвӑрринчи 1-мӗш гимназин "Я - Ты - Мы" ушкӑн тухрӗ. Ҫӗнтерӳҫӗсене тата вӗсене пулӑшса пыракан вӗрентекенсене дипломсемпе сертификатсем, парнесем парса хавхалантарчӗҫ.
Оксана Верликова, Андрей Шоклев
