Пичет кунӗ тӗлне республикӑри журналистсен пӗрлешӗвӗ кашни ҫулах конкурс йӗркелет. Ҫемен Элкер ячӗллӗ премишӗн кӑҫал 6 ӗҫ тупӑшнӑ. Ӑна комисси 2 ҫынна пама йышӑннӑ. Лауреат ятне республикӑри спорт пурнӑҫне ҫутатнӑшӑн "Чувашия" телерадиокомпани корреспонденчӗ, "Мастер спорта" кӑларӑм авторӗ Вячеслав Ильин тата "Советская Чувашия" хаҫатӑн тӗп редакторӗ Владимир Васильев "Интервью в студии "СЧ" медиа-проектшӑн тивӗҫрӗҫ. Николай Никольский ячӗллӗ премине илме 3 ҫын заявка тӑратнӑ. Тӳресем "Республика" хаҫат корреспонденчӗн Владислав Николаевӑн Мухтавлӑ ентешсен ҫулталӑкне халалланӑ ӗҫне суйласа илнӗ. Ял хуҫалӑх, ҫут ҫанталӑк ыйтӑвӗсемпе ҫыракансене Леонид Ильин ячӗллӗ премине парса хавхалантараҫҫӗ. Хальхинче ӑна "Хыпар" издательство ҫурчӗн ача-пӑча кӑларӑмӗсен редакторӗ Лена Атаманова тивӗҫрӗ. Йӑлана кӗнӗ йӗркепе ҫӗнтерӳҫӗсене Раҫҫей тата Чӑваш пичечӗн кунӗсене халалланӑ уявра чыслӗҫ. Вӑл ыран Шупашкарти Пӑр керменӗнче пулать.
Екатерина Фомина
