535 страница, 1 200 ытла статья, вӑл шутра 800 ытла биографи тата 900 яхӑн сӑнӳкерчӗк. Ҫакӑн пек калӑпӑшлӑ кӗнеке кӑларас шухӑш авторӑн 3 ҫул каялла Федор Карягин профессӑрӑн экологи энциклопедине пахаланӑ вӑхӑтра ҫуралнӑ. Унӑн тӗслӗхӗ ҫурт-йӗрпе коммуналлӑ хуҫалӑх тытӑмӗнче ҫур ӗмӗре яхӑн вӑй хуракан Валерий Алексеева хӑпартлантарса янӑ. Вӑл тӳрех ӗҫе пикеннӗ.
Хамӑр историне, йӑх-несӗлсене пӗлмесӗр - пуласлӑх ҫук, тесе ахальтен каламан. 1235 экземплярпа пичетленсе тухнӑ энциклопеди вара ҫурт-йӗрпе коммуналлӑ хуҫалӑх отраслӗнче нумай ҫул хушши вӑй хунӑ паллӑ ҫынсен ӗҫӗ-хӗлне ӗмӗрлӗхе астӑвӑмра упраса хӑварма пулӑшӗ. Кӗнекене республикӑри ҫак тытӑмра тӑрӑшакансем хавхалансах йышӑннӑ.
Энциклопедине пахалама хутшӑннисем автора вӑраха ямасӑр изданин 2-мӗш пайне кӑларас ӗҫе пуҫӑнма вӑй-хӑватпа ӑнӑҫу сунчӗҫ.
Оксана Верликова, Михаил Солин
